USD 340.98

EUR 394.60

РУБ 5.34

Қытайда Қазақстанның білім күндері өтіп жатыр

Қытайда Қазақстанның білім күндері өтіп жатыр

Білім және ғылым министрлігі мен еліміздегі жоғары оқу орындардың өкілдері Бейжің біріккен университетінде Қытай жұртын осы саланың жетістіктерімен таныстырды.

Шараның мақсаты – қытайлық жастарды отандық университеттерге тарту, екі елдің білім саласындағы жетістіктерін одан әрі дамыту.

Қазақстан алдағы уақытта Орталық Азияда білім хабын құруды жоспарлап  отыр. Сондықтан өзге елдермен бұл саладағы әріптестікті нығайтуға бар күшін салып жатыр. Биыл әлемнің 7 мемлекетінде Қазақстанның осындай білім күндері өткізілді. Ал іргелес жатқан Қытай Халық Республикасымен байланыс тіптен тығыз.       

Зульфия Төребекова, «Халықарылық бағдарламалар орталығы» АҚ вице-президенті:

- Жалпы бүгінгі күні Қазақстанда 13 мыңға жуық шетел азаматы білім алатын болса, олардың 1700-і осы Қытай елінен келген азаматтар. Біздің қазақстандық азаматтардың 13 мыңға жуығы дәл сондай санда Қытайдың ЖОО білім алып жатыр.

Білім саласындағы әріптестіктің табысты нәтижесі көп күттірген жоқ. Қазақстанның мыңдаған жасы Қытайдың озық университеттерінде білім алып, мықты мамандықты меңгерді. Қазір ел игілігі үшін еңбек етіп жатыр. Стратегиялық серіктесіміздің студенттері де қазақ тілінде сөйлеп, болашағын біздің елмен байланыстырғысы келеді.   

Чжоу Вэньцинь, Орталық ұлттар университетінің студенті:

- Мен орталық Отырар университетінде қазақ тілі мен әдебиетін оқимын. Биыл жазда, биыл жаз маусымында мен Шыңжаңға барып, қазақ тілі практикасын жасағанда көптеген апай, ағай және қазақ достарыммен бірге көңілді сәттерді өткіздім. Оқуды бітірген соң Қазақстанға баратын ойым бар.

Қытайдың үлкен қалаларын аралап жүрген делегацияның құрамында қазақстандық 20 жоғары оқу орнының басшысы бар. Олар бұл шара арқылы көршілес елге өз мекемесінің әлеуетін таныстыруға мүмкіндік алды. Әріптестерімен қол алысып, болашақтағы істердің жәй-жапсарын талқылады.

Әбдімүтәліп Әбжаппаров, Көкшетау мемлекеттік университетінің ректоры:

- Осы ынтымақтастықтың арқасында біз Қытай Республикасының жоғары оқу орындарымен келісімшарттарға қол қойып, студенттермен алмасу, ұстаздармен алмасу, ортақ ғылыми жобалар жасау, қос дипломды білім беру шараларын келісіп жатырмыз. Алғашқы күндердің нәтижесі өте жақсы.

Желтоқсанның 15-і күні Қазақстанның білім күнін Цзиньхуа университетінде өткізіледі. Бұған дейін делегация Шанхай қаласындағы Фудань жоғары оқу орнында екі күн болып, дәл осындай шаралар ұйымдастырды. 

Авторлары: Нұрбек Бекен, Жаң Сүй

Хабар 24 әлеуметтік желілерде