Қарағанды облысында екі тәулікте қардың бір жарым айлық мөлшері жауып, тұрғындарды әбігерге салды, деп хабарлайды «Хабар 24».
Таң атпастан жұмысқа асыққан көпшілік кешігіп қалған. Себебі автожолдарда да ұзын-сонар кептеліс орнаған. Полиция департаменті берген ақпаратқа сүйенсек, қазірдің өзінде тек Қарағанды қаласында 6 бірдей жол-көлік оқиғасы тіркеліпті. Абырой болғанда, зардап шеккендер мен қаза тапқандар жоқ. Қазір облыс орталығының көшелерінде қызметкерлер мен 300-ге жуық техника тынымсыз еңбек етіп жатыр. Ал, облыс көлемінде 8 бірдей бағыт бойынша жол жабық жатыр.
Ермағанбет Бөлекпаев, қала әкімі:
- Біздің бірінші мақсат қоғамдық көліктердің жүруін қамту, одан кейін әлеуметтік нысандарға жолды ашу болып табылады. Оған 3-4 күн уақыт берілді. Майқұдықта ЖКО болып, көлік кептелісі болған, қазір ғана сол жерден келдім, мәселе шешімін тапты.