Түркияда тоқыма өнеркәсібі тоқырады

Негізі Ресей мен Украина Түркияның ірі сауда әріптестері. Бұл ел былтыр Украинаға жалпы сомасы 700 млн долларға жететін тоқыма экспорттаған болатын. Ал Ресейге бұдан 2 есе көп осындай өнім жіберілді. Украинадағы қарулы қақтығыс пен инфляция түрік кәсіпкерлерін екі бүйірден қысып тұр, деп хабарлайды «Хабар 24».

Мехмет Йар, киім өндіруші:

– Соғыс басталғалы Украинамен арадағы сауда-саттық толық, ал Ресеймен жартылай тоқтады. Өнімдеріміздің 30%-і осы 2 елге жеткізілетін. Бұдан басқа, Ресейге жіберілген кейбір тауарларымыз орта жолда тұрып қалды. Ақшамызды аламыз ба, жоқ па, ол  жағын мүлде білмейміз.

Украинада бүгінге дейін түрік тауарларының 500-ге жуық дүкені жабылды. Ал Ресейде 600-ден астам компания келісімшартты бұзып, миллиондаған тапсырысты кері қайтарды. Қарулы қақтығыстың алғашқы аптасында ғана Түркияның тоқыма саласы 200 млн-нан астам доллардан айырылды. Бұл – Ыстамбұл тоқыма экспорттаушыларының қауымдастығы келтірген мәлімет. Түркияда жалпы ішкі өнімдегі жеңіл өнеркәсіптің үлесі 20 %-тен асады және жылына бюджетке бұл саладан ондаған миллиард доллар түседі.

Шереф Файят, Сауда биржалары одағының президенті:

– Украина жақын арада қалпына келе қоймас, сондықтан біздің саудамыз 2021 жылмен салыстырғанда 15 %-ке төмендейтіні сөзсіз. Оның үстіне, санкциялар ресейліктердің төлем қабілетіне кері әсер етіп жатыр. Ресеймен арадағы сауда 20-25 %-ке дейін азаюы әбден мүмкін.

Түркия батыс елдері сияқты Кремльге қарсы санкция енгізген жоқ. Осының арқасында әлемдік брендтердің Ресейден кетуі Анадолы елі үшін оңды болуы мүмкін. Сондай-ақ түрік өндірушілері қазір Африка мен Шығыс Еуропа нарығына экспорт көлемін арттыруды жоспарлап отыр.

Авторы: Ернат Мелсұлы