Бельгияда «Brussels Airlines» қызметкерлері ереуілге шықты

Бельгияда «Brussels Airlines» әуе компаниясының қызметкерлері 3 күндік ереуілге шықты. Ереуіл салдарынан 315 рейс кейінге шегерілді, деп хабарлайды «Хабар 24».

Салдарынан 40 мыңға жуық жолаушы сапарынан қалды. Наразылар еңбек жағдайын жақсартуды талап етуде. Айтуынша, басшылық қосымша жеңілдіктер үшін бюджетті индекстеуден бас тартады. Жиналғандар еңбекақының дұрыс төленбеуіне де өкпелі. Сонымен қатар маман тапшылығынан қызметкерлердің жұмыс жүктемесі бірнеше есе ұлғайған. Ал пандемиядан кейін тұралап қалған туризм саласы қайта күш ала бастады.

– Қазір маман тапшылығы мәселесі өзекті. Бұл проблеманы бір айдан астам уақыт көтеріп келеміз. Алайда басшылық тарапынан еш әрекет жоқ.

– Бізге демалыс керек. Бұл өте маңызды және жұмыс сапасына әсер етеді. Мәселен, төтенше жағдай кезінде жедел әрекет ету қажет. Ал біз болсақ, тыным таппай шаршап жүреміз.