Австрияда табиғат апаты қауіп төндіріп тұр

Австрияның оңтүстігіндегі Каринтия аймағында толассыз жауған нөсер соңы алапат тасқын мен лай көшкініне ұласты, деп хабарлайды «Хабар 24».

Табиғат апатынан 1 адам көз жұмды. Тағы 1 тұрғын із-түзсіз жоғалып кеткен. Филлах қаласында 7 жарым мың үй жарықсыз қалды. Ауыз су тапшылығы туындап, ұялы байланыс нашарлаған. Метерологтар жауын-шашын бүгін де жалғасады деп болжады.

Даниел Фелнер, құтқарушы:

– Аймақтағы табиғат апаты адам өміріне тікелей қауіп төндіріп тұр. Көптеген ауылдарға жол жабылып қалды. Лайды метрлеп аршып жатырмыз. Қазіргі ең басты міндетіміз  – негізгі жолдарды тазалау.