Шымкентте жұрт жол жөндеуге шықты

Шымкент қалалық әкімдігі шұрық-тесік жолдарды тұрғындардың өздері жөндеп жатқан видеоға қатысты түсініктеме берді, деп хабарлайды «Хабар 24».

«Қайнар бұлақ» саяжай массивінде түсірілген бейнежазба әлеуметтік желіде тараған болатын.

Бұл жазбаны жергілікті тұрғын Сергей Фролов түсірді. Азамат жолдың сапасыздығынан көлік апаты жиі болатынан айтады. Халық әкімдігінен көмек сұраған. Бірақ уәделерін уақытылы орындамағандықтан, тұрғындар оны өз қаражатына жасауға шешім қабылдапты.

Сергей Фролов, қала тұрғыны:

- Мұна жерге екі қап қиыршық тас әкелу қиын емес шығар деп ойлаймын. Асфальт деген атымен жоқ. Ақша қарастырылған ба, жоқ па ? Нақтысын білмедім. Бұл маңда қозғалыз көп. Әкімнің орынбасары келіп, өзі көріп кетті. Сонымен болды, еш шаруа басталған емес.

Қалалық жолаушылар көлігі және автомобиль жолдары басқармасындағылар бұл мәселеден хабардар. Қайнар бұлақтағы жөндеу жұмыстары енді тамыз айында басталады деп сендіріп отыр.

Мадияр Байымбетов, қалалық Жолаушылар көлігі және автомобиль жолдары басқармасы басшының орынбасары:

Күтіп ұстау жұмыстарын наурыз айының басында бастау керек болса, біз сәуір айының аяғында бастадық. Бір айға кешігіп бастадық. Кешегі күннен бастап, осы Қайнар бұлақтағы көтерілген мәселе бойынша мердігерге тапсырма берілді. Соның негізінде жұмыстар басталды. Біздің жоспарымыз бойынша тамыз айының 10-на дейін Қайнар бұлақта кешіліктер толығымен орындалады.