Қызылорда облысында жол апатынан қаза тапқан адам саны беске жетті

Қызылорда облысындағы жол апаты салдарынан қайтыс болғандар саны бес адамға жетті, деп хабарлайды ҚазАқпарат.

Оқиға бүгін, 13 қаңтарда сағат 14:20 шамасында «Қызылорда-Құмкөл» автожолының 69 шақырымында болды. Сол аумақта «Мерседес Бенц Спринтер» және «Тойота Хайлюкс» автокөліктері соқтығысқан.

Жол-көлік оқиғасы салдарынан екі автокөліктің жүргізушісі, бір жолаушы оқиға орнында көз жұмған. Ал екі жолаушы медициналық мекемеде қайтыс болды.

Қалған 5 жолаушыға медициналық көмек көрсетілді.

«Оқиға орнында полиция қызметкерлері, төтенше жағдай және медицина қызметкерлері жұмыс істеп жатыр. Жол-көлік оқиғасы жол ережесін бұзу салдарынан болуы мүмкін. ҚР Қылмыстық кодексінің 345-бабының 4-бөлігі бойынша сотқа дейінгі тергеу басталды. Онда көлік құралдарын жүргізуші тұлғалардың жол қозғалысы немесе көлік құралдарын пайдалану ережелерін бұзу жағдайы көрсетілген», - деп хабарлады Қызылорда облыстық өңірлік коммуникациялар қызметі.

Бұл оқиға бойынша тиісті сараптамалар тағайындалған. Оқиғаның мән-жайы анықталуда.