Оралда екі үйдегі өрттен 17 адам эвакуацияланды
Оралда екі көп қабатты үйде өрт болып, 17 адам эвакуацияланды, деп хабарлайды ҚазАқпарат.
БҚО ТЖД баспасөз қызметінің мәліметінше, оқиға 2 қазан күні болды. Сағат 16:02-де Гагарин көшесі 105/2 мекен-жайында орналасқан төрт қабатты үйден өрт шыққаны жөнінде хабар түскен. Тұрғын үйдің 26-пәтерінде асүйде жиһаз бен жеке заттар отқа оранды. Оқиға орнынан 9 адам шығарылды, оның төртеуі балалар. Аталған пәтер иесі - әйел адам құтқарылды. Өрт департамент күшімен (7 қызметкер, 2 техника) 16:25-те сөндірілді.
Сонымен қатар кеше сағат 22.12-де Зачаган кенті Жәңгір хан көшесі, 43 мекен-жайында 9 қабатты жатақханадан өрт шықты. Жәңгір хан атындағы Батыс Қазақстан аграрлық-техникалық университеті жатақханасының екінші қабатындағы 215-бөлмеде жеке заттар жанды. Оқиға орнынан 8 студент эвакуацияланды. Зардап шеккендер жоқ. «Тілсіз жау» сағат 22.57-де ауыздықталды. Өртті сөндіруге 9 қызметкер 3 техникамен жұмылдырылды.
Қазіргі кезде өрт оқиғаларының шығу себебі, келтірілген шығын анықталып жатыр.