БҚО-да мүйізді ірі қара арасында жұқпалы ауру өршіп барады

Батыс Қазақстан облысында мүйізді ірі қара арасында жұқпалы дерт өршіп барады.​ Бүгінге дейін 7 ауданда түйе малынан індет анықталған.

Ауырған 2 мыңнан аса малдың басым бөлігі жазылды. Дегенмен, бұл ресми тіркелген мәлімет ғана. Алыс аудандарда есепке алынбағандары көп болуы да мүмкін. Әзірге шаруалар малды өз күшімен емдеп жатыр. Басында тұрғындар бұл кесел «аусыл»​ деп күдіктенген. Бірақ лабораториялық зерттеу барысында әзірге аусыл қоздырғыштары табылмапты. Алынған сынама қорытындысы Шыңғырлау, Сырым, Қаратөбе аудандарында малдың, ринотрахейтпен ауырғанын айтады. Ал Бөкей Ордасы, Қазталов, Жаңақала, Ақжайық аудандары бойынша сараптама нәтижесі әлі шыққан жоқ. Сұраныс артқан соң аусылға қарсы екпе табу қиындап кетті. Ал екпе салудың қажеттігін мамандар Қарағанды мен Орынбор аймақтарында аусыл шығуымен түсіндірді.

Балдай Сапарғалиева, облыстық ветеринария басқармасының бөлім басшысы:

- Жалпы ауру басталғалы мүйізді ірі қара малдары арасында шығын жоқ. Эпизоотиялық ахуал ветеринар мамандардың жіті бақылауында. Қазіргі таңда аусыл ауруының алдын алу үшін ​Ауыл шаруашылығы министрлігінен мүйізді ірі қара, ұсақ мал және шошқа басын толығымен вакциналауға және ревакциналауға вакцина сұратудамыз.