Токио 2020: Бүгін Қазақстан атынан кімдер сынға түседі?

Бүгін Токиодағы Олимпиада төрінде бокстан 91 келіден жоғары салмақта ел намысын қорғайтын Қамшыбек Қоңқабаев финалға берілер жолдаманы сарапқа салады, деп хабарлайды «Хабар 24».

Ұлттық құраманың капитаны жартылай финалда америкалық Ричард Торреспен қолғап түйістіреді. Жекпе-жек Нұр-Сұлтан уақытымен сағат 12:20-да басталады деп жоспарланған. Сондай-ақ велошабандоз Сергей Пономарев спринтте жүлдеге таласып көреді. Еркін күрестен Нұрислам Санаев Олимпиададағы алғашқы белдесуін өткізеді. Сегізден бірінші финалда қазақстандық палуанға Гвинея-Бисау өкілі қарсы тұрады. Бұдан бөлек, бүгін байдарка және каноэ есуден Маргарита Торлопова мен Наталья Сергеева бақ сынайды.