Қазақстандық теннисші Елена Рыбакина алғаш рет әлемдік рейтингтің ондығына кіреді

Ол күні кеше Аустралия ашық чемпионатының финалына жолдама алған болатын.

Соңғы сында Беларусь өкілі Виктория Азаренкомен жолығып, айқын басымдықпен ұтты. Айта кету керек, Азаренко әлемдік рейтингте 24-ші, ал Рыбакина 25-ші тұр. Осы жеңістің арқасында жерлесіміз бірден ондыққа көтеріледі. Бұл – Елена Рыбакина үшін рекордтық көрсеткіш. Бұдан бұрынғы үздік нәтижесі 12-ші орын еді. Жалпы Қазақстаннан бірде-бір теннисші үздік ондықта болмаған. Аустралия ашық чемпионатының финалы ертең өтеді. Оның аясында Елена Рыбакина тағы бір Беларусь өкілі Арина Соболенкомен кездеседі. Қос мықты бұған дейін 4 рет жолыққан. Оның үшеуінде Арина жеңіске жетсе, біреуінде Еленаның жолы болды. Мельбурн қаласындағы турнир 29-шы қаңтарға дейін жалғасады. Ал оның жалпы жүлде қоры 54 млн АҚШ долларын құрайды.