Президент V Дүниежүзілік көшпенділер ойындарының дайындық барысымен танысты

Бүгін Мемлекет басшысы V Дүниежүзілік көшпенділер ойындарының дайындық барысымен танысты, деп хабарлайды 24kz.

Президент ең алдымен «Астана Арена» стадионын аралап көрді. Мұнда халықаралық спорттық-мәдени іс-шараның ашылу салтанаты өтеді. 30 мың көрермен еркін сыятын стадионға жыл бойы күрделі жөндеу жүргізілді. Қазіргі кезде абаттандыру жұмыстары аяқталып, жабдықтары толықтай жаңартылды. Содан соң Қасым-Жомарт Тоқаевқа «Qazaqstan» жеңіл атлетика кешенінде орналасқан Аккредиттеу орталығының жұмысы, Көшпенділер ойынына қатысатын ұлттық құраманың киім үлгісі таныстырылды. Халықаралық іс-шараға 1500 ерікті тартылады. Спорт және туризм министрі Ермек Маржықпаевтың сөзінше, ұлтық құрама осы уақытқа дейін халықаралық және республикалық деңгейде 42 оқу-жаттығу жиынын өткізген. Спортшыларымыз 7 халықаралық және 25 республикалық турнирге қатысты. 

Ермек Маржықпаев, ҚР Спорт және туризм министрі:

- Ойындарды өткізу мақсатында 7қалалық нысан бекітілген. Спорттық жарыс бойынша 97 медаль жиынтығы сарапқа салынады. 100 мыңға жуық турист келеді деп күтеміз. V Дүниежүзілік көшпенділер ойындарының бағдарламасы 3 бағытта қамтиды: спорт, мәдениет және ғылым. Ойындарға 2800 қатысушы мен ресми өкілдер келеді.

V Дүниежүзілік көшпенділер ойындарына әлемнің 89 елінен спортшылар келеді деп күтіледі. Дода аясында 150-ден астам мәдени іс-шара жоспарланған. Мемлекет басшысы негізгі жарыс өтетін «Қазанат» ипподромына да барды. Мұнда ат спортынан жарыстар өтеді. Бұл жерде Президент жамбы ату және теңге ілу сайыстары үшін арнайы жасақталған алаңды көрді.