Қазақстанда балалар мен жасөспірімдерге арналған жеке қауіпсіздік сабақтарының мазмұны түбегейлі жаңартылып, бағдарламаға дипфейк, дропперлік және интернет-алаяқтық сияқты заманауи қауіп-қатерлерге қарсы 140-тан астам жаңа тақырып енгізілді, деп хабарлайды «24KZ».
Оқу-ағарту министрлігі ЮНИСЕФ және бейінді мемлекеттік органдармен бірлесіп әзірлеген бұл ауқымды бағдарлама балабақшаларда, мектептерде және колледждерде апта сайын сынып немесе кураторлық сағат аясында 10 минуттық қысқа форматта өткізіледі.
Мұндағы басты мақсат - теориялық білім беру емес, балалардың нақты өмірлік жағдайларды талдау арқылы қауіпті алдын ала тану, өзін-өзі қорғау және көмек сұрай білу сияқты практикалық дағдыларын қалыптастыру.
Сабақ мазмұны оқушылардың жас ерекшеліктеріне қатаң түрде бейімделген. Атап айтқанда, мектепке дейінгі жастағы балалар бейтаныс адамдармен қауіпсіз қарым-қатынас жасауға және адасып қалғанда әрекет етуге үйренсе, бастауыш сыныптарда жеке шекара, интернет қауіпсіздігі және төтенше жағдайлар кезіндегі іс-қимылдар қарастырылады.
Ал жасөспірімдер мен жоғары сынып оқушыларына кибербуллинг, дербес деректерді қорғау, дипфейктер, қаржылық алаяқтық пен оңай ақша табудың жолы саналатын дропперлік схемалардың қаупі түсіндіріледі.
Бұл бастама өсіп келе жатқан ұрпақтың күнделікті өмірде де, цифрлық кеңістікте де жан-жақты қорғалған болуын қамтамасыз етуге бағытталған.
Phone: +7 (7172) 757 485
E-Mail: 24kz@khabar.kz