Денсаулық сақтау министрлігі балалардың ұйқы режимін қалпына келтіруге шақырды

Жаңа оқу жылының басталуына санаулы күндер қалғанда Денсаулық сақтау министрлігі ата-аналарға маңызды үндеу жасады, деп хабарлайды«24KZ». Ведомство өкілдері жазғы демалыста бұзылған балалардың ұйқы режимін алдын ала қалпына келтіру қажеттігін ескертті. Мамандардың айтуынша, 6–12 жастағы мектеп оқушылары тәулігіне 9–12 сағат, ал 13–18 жастағы жасөспірімдер 8–10 сағат тынығуы тиіс.

Мектепке дайындық тек форма мен оқу құралдарын сатып алумен шектелмейді. Жаз мезгілінде кеш жатып, кеш тұруға дағдыланған баланың күн тәртібін уақытында реттемесе, оқу жылының алғашқы апталары ауыр соғуы мүмкін.

 

Америкалық педиатрия академиясының ұсынымдарына сәйкес, баланың тәуліктік ұйқы ұзақтығы оның жасына тікелей байланысты:

• 1 жасқа дейін: 12–16 сағат;

• 1–2 жас аралығы: 11–14 сағат;

• 3–5 жас аралығы: 10–13 сағат;

• 6–12 жас аралығы: 9–12 сағат;

• 13–18 жас аралығы: 8–10 сағат.

Толыққанды демалыс баланың зейінін шоғырландыруына, жаңа ақпаратты тез меңгеруіне және бүкіл оқу күні бойы жұмысқа қабілеттілігін сақтауға тікелей әсер етеді.

Бірінші сынып оқушыларына қойылатын талаптар

Мектеп табалдырығын алғаш аттайтын бала үшін күн тәртібінің өзгеруі – үлкен стресс. Жаңа режим, ерте тұру және тынымсыз сабақтар жүктемесі бейімделуге біраз уақытты талап етеді.

Сондықтан мамандар бірінші сынып оқушыларына ұзақтығы екі сағатқа дейінгі қосымша күндізгі демалысты ұйымдастыруға кеңес береді. Алғашқы апталардағы басты міндет – баланы жаңа тәртіпке күрт емес, біртіндеп үйрету.

Каникулдан кейін режимді қалай қалпына келтіруге болады?

Мектеп режиміне ауысу кезінде ата-аналарға мынадай қарапайым ережелерді ұстану ұсынылады:

1. Күн тәртібін қатаң сақтау: Баланы күн сайын шамамен бір уақытта ұйықтатып, бір уақытта ояту қажет. Бұл ереже демалыс күндері де сақталғаны жөн.

2. Гаджеттерді шектеу: Кешкі уақытта смартфон, планшет пен компьютерді пайдалануды азайтып, тым белсенді ойындардан бас тартқан дұрыс.

3. Тыныш орта қалыптастыру: Ұйықтар алдында таза ауада серуендеу, жылы душ қабылдау немесе кітап оқу баланың жүйке жүйесін тынықтырады.

4. Бөлмені дайындау: Ұйықтайтын орынның жайлы болуын қамтамасыз етіп, бөлмені үнемі желдетіп тұру маңызды.

Мамандар қосымша сабақтар, үй тапсырмалары немесе кешкі ойын-сауықтар түнгі демалыс уақытын қысқартпауы тиіс екенін ескертеді. Ұйқысы қанған бала сабақты жақсы оқып қана қоймай, күні бойы сергек әрі белсенді болады.

Тегтер #оқушы #каникул #ұйқы режимі #24жаңалықтар #24KZ