Солтүстік Қазақстан облысында мал шаруашылығын дамытуға 10 миллиардтан астам теңге бөлінді, деп хабарлайды 24KZ. Енді тауарлы-сүт фермасын салуға ниетті кәсіпкерлер үшін төмен пайызды несиелер қолжетімді болады. Осылайша қайта өңдеу саласын өркендетуге бар жағдай жасалады.
Қызылжар ауданында тауарлы-сүт фермасында 650 бас асылтұқымды сиыр бар. Олардың күтімі толық автоматтандырылған. Жем-су беру, сауу жүйесі белгіленген бағдрлама арқылы жүзеге асады.
Шетелден әкелінген асылтұқымды малдың өнімділігі өте жоғары. Мысалы, мына фермадағы кейбір сиырлар тәулігіне 45-50 литрге дейін сүт береді.
Заманауи кешеннің құрылысына 3 млрдтан астам теңге жұмсалды. Оның бір бөлігі кәсіпкерге 2,5% несиемен берілді. Фермада тәулігіне 20 тонна сүт сауылып, бірден өңдеуші зауыттарға жөнелтіледі.
Данияр Жүсіпов, зоотехник:
- Симментал тұқымының ерекшелігі жергілікті климатқа тез бейімделуінде. Суыққа, ыстыққа төзімді. Ал гольштин тұқымына ерекше күтім керек. Бірақ сүтті келеді.
Облыс бойынша осындай 42 заманауи тауарлы-сүт фермасы бар. Бұл өңдеуші кәсіпорындарды сапалы шикізатпен қамтамасыз етіп, сүт өндірісіне тың серпін берді.
Дәурен Тоққожынов, ауыл шаруашылығы басқармасының басшысы:
- Мемлекеттің қолдауы арқасында сүтті мал шаруашылығы қарқынды дамып келеді. Былтыр өңірде 17 тауарлы-сүт фермасы іске қосылды. Бұл сүт өндірісін 65 мың тоннаға ұлғайтуға мүмкіндік береді.
Орталық Азиядағы ең ірі тауарлы-сүт фермасы Солтүстік Қазақстанда орналасады. Қазір оның құрылысы жүріп жатыр. 8 мың сиыр бағылатын кешен жасанды интеллект арқылы басқарылады. Жоба 9 млрд теңгеге бағаланған.
Авторлары: Айдарбек Айтмұхамбетұлы, Қуаныш Қазбеков
Тегтер #СҚО #мал шаруашылығы #сүт фермасы #24KZ #Қазақстан жаңалықтарыPhone: +7 (7172) 757 485
E-Mail: 24kz@khabar.kz