Тамыз айында Қазақстанның теміржол желісі арқылы 1,157 млн тонна астық тасымалданды. Бұл өткен жылдың сәйкес айымен салыстырғанда 35%-ға көп, деп хабарлайды 24KZ.
«Қазақстан темір жолы» компаниясының мәліметінше, жаңа астық маусымының алғашқы миллион тоннасы егін жинау науқаны басталған кездің өзінде тасымалданған.
Жүкті жеткізу үшін 16,3 мыңнан астам вагон пайдаланылды. Оның 895 мың тоннасы экспортқа жөнелтілсе, 262 мың тоннасы ішкі нарыққа жеткізілді. Экспорт көлемі бір жылда 46%-ға артқан. Ұн және басқа да ұн өнімдерін тасымалдау да 18%-ға өсті.
Негізгі өсім Орталық Азия елдеріне жөнелтілімдер есебінен қамтамасыз етілді. Бұл бағыттағы тасымал 45%-ға өскен. Қытайға астық жөнелту екі есеге, ал Ауғанстанға үш еседен астамға артты.
ҚТЖ өкілдері тамыздағы жоғары көрсеткішті егін жинау науқанының биыл ертерек басталуымен түсіндірді. Соған байланысты астық жөнелтудің негізгі кезеңі жаздың соңына ауысқан.
Қазір теміржол желісінде жаңа астықты тасымалдауға шамамен 15,2 мың астық тасымалдаушы және 17,1 мың жабық вагон дайын. Компанияның бағалауынша, жүк жөнелтушілер өтінімдерді уақытылы беріп, вагондарды бірқалыпты түсірген жағдайда қолда бар вагон паркі биылғы өнімді тасымалдауға жеткілікті.
Астық тасымалының негізгі шарықтау кезеңі қыркүйек пен қазан айларына жоспарланған. Жеткізілімдерді үйлестіру үшін ҚТЖ вагон операторлары, теңіз порттары, астық одақтары және экспорттаушылардың қатысуымен жедел штаб құрды.
Тегтер #24KZ #24жаңалықтар #астық жинау #ҚТЖPhone: +7 (7172) 757 485
E-Mail: 24kz@khabar.kz