Қазақстанда жыл басынан бері 9,3 млн тонна астық теміржол арқылы жеткізілді, бұл өткен жылдың сәйкес кезеңімен салыстырғанда 13%-ға көп, деп хабарлайды 24KZ ҚР Көлік министрлігіне сілтеме жасап.
2025 жылдың алғашқы сегіз айында теміржолмен 8,2 млн тонна астық тасымалданған. Ал жаңа егін жинау науқаны басталғалы бері тасымал көлемінің өсімі байқалады. Мәселен, тамыз айында 1,1 млн тонна астық теміржол арқылы жөнелтілді. Бұл өткен жылдың тамыз айындағы көрсеткіштен 35%-ға жоғары.
Экспорттық тасымал көлемі де өскен. Сегіз айда сыртқы нарықтарға теміржол арқылы 7,2 млн тонна астық жөнелтілді. Бұл 2025 жылдың осы кезеңімен салыстырғанда 14%-ға көп. Былтыр экспорт көлемі 6,3 млн тонна болған.
Астық экспортының негізгі бағыты – Орталық Азия елдері. Бұл өңірге 4,8 млн тонна астық жөнелтілген, яғни бір жыл бұрынғы көрсеткіштен 37%-ға артық.
Атап айтқанда, Өзбекстанға 3,6 млн тонна астық тасымалданды. Бұл өткен жылмен салыстырғанда 50%-ға көп. Тәжікстанға 1 млн тонна, Ауғанстанға 655 мың тонна астық жөнелтілген. Ауғанстанға жеткізу көлемі бір жылда 4,4 есе артқан.
Қытайға да астық экспорты ұлғайды. Жыл басынан бері бұл елге 558 мың тонна астық тасымалданды. Бұл 2025 жылдың сәйкес кезеңімен салыстырғанда 33%-ға көп.
Астық тасымалын тұрақты ұйымдастыру үшін Көлік министрлігі арнайы жұмыс тобын құрды. Оның құрамына тасымалдау процесіне қатысушылар кіріп, топ олардың жұмысын үйлестіреді.
Жұмыс тобы теміржол инфрақұрылымы мен вагондар паркінің артқан жүк көлемін қабылдауға дайындығын бақылайды. Сондай-ақ астықты біркелкі тиеуге, вагондардың қозғалысын тиімді ұйымдастыруға және олардың станцияларда ұзақ тұрып қалуына жол бермеуге басымдық беріледі.
Тегтер #астық тасымалдау #теміржол #24жаңалықтар #24KZPhone: +7 (7172) 757 485
E-Mail: 24kz@khabar.kz