«Ақ жол» партиясы фракциясының депутаттары шағын және орта бизнес үшін барлық өңірде бірыңғай салық мөлшерлемесін белгілеуді ұсынды. Бұл мәселе бойынша депутаттық сауалды Құрылтай депутаты Дәурен Ахметжаев Премьер-министрдің орынбасары – Ұлттық экономика министрі Серік Жұманғаринге жолдады, деп хабарлайды «24KZ».
Депутаттың айтуынша, 2026 жылғы 1 қаңтардан бастап оңайлатылған декларация негізіндегі арнаулы салық режимінің жаңа тәртібі күшіне енді. Салық кодексіне сәйкес, бұл режим бойынша базалық мөлшерлеме 4%-ды құрайды. Ал мәслихаттар оны қызмет түрі мен нысанның орналасқан жеріне қарай 50%-ға дейін төмендетуге немесе көтеруге құқылы.
Осылайша, бір өңірде салық мөлшерлемесі 2%, ал басқа өңірде 6% болуы мүмкін. Дәурен Ахметжаевтың пікірінше, мұндай айырмашылық шағын бизнеске тікелей әсер етеді. Бірнеше өңірде жұмыс істейтін кәсіпкерлер үшін әртүрлі мөлшерлемелер салық есебін жүргізуді де қиындатады.
Депутат бұл мәселе әсіресе ауылдық жерлер мен шағын қалалар үшін маңызды екенін атап өтті. Салық мөлшерлемесінің айырмашылығы кәсіпкерлердің бизнесін басқа өңірге көшіруіне ықпал етуі мүмкін.
Осыған байланысты Дәурен Ахметжаев оңайлатылған декларация негізіндегі арнаулы салық режимі бойынша бүкіл Қазақстанда 2-3% аралығында бірыңғай салық мөлшерлемесін белгілеуді ұсынды. Сондай-ақ мәслихаттардың бұл мөлшерлемені өзгерту құқығын алып тастауды ұсынды.
Бұдан бөлек, депутат салық мөлшерлемелеріндегі айырмашылықтың бизнестің орналасуына әсерін талдауды, оның ішінде ауылдар мен шағын қалалардан облыс орталықтарына көшу жағдайларын зерттеуді ұсынды.
Дәурен Ахметжаев шағын және орта бизнес үшін барлық өңірде бірдей негізгі салық шарттарын қамтамасыз ету мақсатында Салық кодексіне қажетті өзгерістер енгізу мәселесін қарастыруды сұрады.
«24KZ» Telegram-арнасына жазылыңыз
Тегтер #24KZ #24жаңалықтар #құрылтайPhone: +7 (7172) 757 485
E-Mail: 24kz@khabar.kz