Қазақстанға осы уақытқа дейін 155 млрд доллардан астам тікелей шетелдік инвестиция тартылған. Енді мемлекет инвесторларды өзі іздеп, жобаларды жүзеге асыруға қолдау көрсететін жаңа жүйеге көшіп жатыр. Бұл туралы 24KZ телеарнасының «Экономика» бағдарламасында айтылды.
2026 жылдың алғашқы тоғыз айында өңдеу өнеркәсібіне салынған инвестиция 41 пайызға өскен. Ал тау-кен саласына бағытталған қаражат 4,8 пайызға азайған.
Ұлттық статистикаға жүгінсек, 2026 жылдың тоғыз айында өңдеу өнеркәсібіне салынған инвестиция 41 пайызға өсті, ал тау-кен саласында 4,8 пайызға төмендеді. Бұл инвестициялардың салалық құрылымында өзгеріс бар екенін көрсетеді, – деді Qazaq Expert Club сарапшысы Раушан Тасшоинова.
Қазақстанда инвестиция тартудың жаңа моделі қалыптасып жатыр. Оның басты ерекшелігі – мемлекет инвесторлардың келуін күтпей, экономиканың қажеттілігіне қарай жобаларды өзі ұсынып, шетелдік компаниялармен тікелей жұмыс істейді. Бұл жұмыс үш деңгейде жүргізіледі: шетелдегі өкілдіктер инвесторларды іздейді, орталық мемлекеттік органдар қажетті жағдай жасайды, ал жергілікті әкімдіктер жер телімі мен инфрақұрылым мәселелерін шешуге көмектеседі.
Проактивті модельдің басты артықшылығы – мемлекет инвесторлардың келуін күтіп отырмайды. Экономиканың қажеттілігіне қарай жобаларды өзі ұсынып, шетелдік компаниялармен тікелей жұмыс істейді. Бұл инвесторлардың қызығушылығын арттырады, – деді Раушан Тасшоинова.
Мемлекет басшысы Қасым-Жомарт Тоқаев Жолдауында инвестиция тарту ісін бір орталықтан басқаруға мүмкіндік беретін жүйені жетілдіру қажеттігін айтқан болатын. Осыған байланысты «Бәйтерек» холдингінің инвестициялық жобаларды үйлестірудегі рөлі күшейтілмек. Холдинг құрамындағы бизнесті қолдау институттарының жұмысын тиімді үйлестіру де осы міндетті жүзеге асыруға көмектеседі.
«Бәйтерек» холдингінің инвестициялық жобаларды үйлестірудегі рөлін күшейту экономикалық тұрғыдан маңызды. Өйткені инвестор үшін тек мемлекеттік қолдаудың қолжетімділігі ғана емес, оны алу тәртібінің түсінікті әрі жылдам болуы да маңызды, – деді Qazaq Expert Club сарапшысы Раушан Тасшоинова.
Жаңа жүйе тиімді іске асса, инвестиция көлемі артып, жаңа өндіріс орындары мен жұмыс орындары ашылады. Бұл халықты жұмыспен қамтуға және ел экономикасының дамуына мүмкіндік береді.
Тегтер #24жаңалықтар #24KZ #инвестиция #жаңа модель #статистика #экономикаPhone: +7 (7172) 757 485
E-Mail: 24kz@khabar.kz