ШҚО-ның тағы екі ауданында жұмыс кестесі бір сағатқа шегерілді

Шығыс Қазақстан облысының тағы екі ауданында жұмыс кестесі бір сағатқа кейін шегерілді, деп хабарлайды 24kz.

Бүгіннен бастап Алтай мен Ұлан аудандарының тұрғындары жұмыс күнін таңғы 08:00-де бастайды. Аталған мәселе кеше ғана талқыланып, шешім қабылданды. Бірақ кейбір жергілікті тұрғындар бұл өзгерістен хабарсыз қалып, жұмысқа әдеттегіден бір сағат бұрын келді. Жаңа кестеге сәйкес түскі ас үзілісі 12:00-ден 13:30-ға дейін жалғасады, ал жұмыс күні 17:30-да аяқталады. Жалпы өңір бойынша 9 аудан осындай жұмыс режиміне көшті. Жұмыс кестесін бір сағатқа кейінге шегеру алғаш рет 5 қаңтар күні Қатонқарағай ауданында пилоттық жоба ретінде енгізілді. Ақпан айында бұл өзгеріс Үлкен Нарын мен Марқакөл аудандарында жалғасын тапты, ал 5 наурыздан бастап Тарбағатай, Күршім және Самар аудандары да жаңа жұмыс тәртібіне көшті. Тұрғындардың пікірінше, бұл өзгеріс күннің жарығын тиімді пайдалануға мүмкіндік береді.

Рүстембек Кемешев, Марқакөл ауданының әкімі:

- Марқакөл ауданында білім ошақтары жаңа айтып кеткендей, 08:00-ден басталады. Мемлекеттік қызметкерлер де толықтай жаңа уақыт бойынша 8:00-ден бастап жұмыс істесек өте тиімді болады деп ойлаймын.

Мейрамбек Қаменжанов, Ақжар ауылының тұрғыны:

- Бұрынғы мынау ауыспай тұрған сағат бойынша есептесек, біз тападай тал түсте жұмысқа келіп жатқандай болушы едік. Мынау енді таңертең 08:00-де бірінші рет келіп тұрмыз. Өте жақсы. Мынау қазақтың керемет мақалы бар ғой: «Ерте тұрған еркектің ырысы артық, ерте тұрған әйелдің бір ісі артық» деп. Мынау жаздың күні осындай уақытпен жұмыс жасаған өте дұрыс деп ойлаймын.