Елордада Сыр өңірі ауылшаруашылық өнімдерінің жәрмеңкесі өтіп жатыр.
Дәстүрлі шараға 70-ке жуық шаруа қатысып, ала жаздай төккен терінің жемісін жұртшылыққа төмен бағада ұсынды.
Биыл Cыр өңірінде бақша дақылдары бітік шықты. Әсіресе Қармақшы ауданының шаруалары олжалы. Дәмі тіл үйіретін қауын-қарбыз Төребай ауылының ғана емес, тұтас өңірдің мақтанышы. Ала жаздай ырыздығын жерден терген дихандар бүгін өнімін төмен бағада елордалықтарға ұсынды.
Дәурен Қалдашбаев, шаруа қожалығының иесі:
- Қармақшы ауданы бойынша Төребай би ауылы бірінші ауыл деп мақтанып айтуға негіз бар. Өйткені біз көкөніс - бақша өнімдерін егуге маманданған ауыл. Аудан көлемінде облысқа дейін шығып, қауын сатып, ауылдың халқы аймақты-көкөніспен қамтамасыз етіп жатыр. Бағасы жергілікті әкімшілік бекіткен бағамен сатылып жатыр. Қауындардың келісі - 250 теңгеден, 300-350 теңгеден.
«Қазалының» кәмпиті, әйгілі ақмаржан күріш, қақталған балықтың неше атасы жәрмеңкедегі сөреден орын тапты. «Бастысы бұл өнімдер табиғи, таза әрі нарықтағы бағадан арзан», - дейді ұйымдастырушылар. Сыр өңірінің мол дастарханын танытуға елордаға 70-ке жуық тауар өндіруші келіпті.
Талғат Дүйсебаев, Қызылорда облысы Ауыл шаруашылығы және жер қатынастары басқармасының басшысы:
- Бұл жәрмеңкеге Сыр өндірушілері үлкен дайындықпен келді. 50-ден астам автөлік пен 70-ке жуық тауар өндірушілер бүгін өз өнімдерін халыққа ұсынуда.Нарықтағы бағадан өнімдеріміз 20-25 пайызға төмен. 500 тоннаға жуық өнімімізді алып келдік. негізі енді сыр өңірінің брендіне айналған ақ күрішіміз - 200 тонна.
Ауыл шаруашылық өнімдерінің жәрмеңкесі «Қазанат» ипподромында ертең де жалғасады. Іс-шара аясында қызылордалық өнерпаздар концертттік бағдарлама ұсынып, халыққа көтеріңкі көңіл күй сыйламақ.
Авторлары: Назерке Тоқжан, Асхат Қарағойшиев
Тегтер #хабар24 #жаңалықтар #елорда #Қызылорда #жәрмеңке #ТаңдаулыPhone: +7 (7172) 757 485
E-Mail: 24kz@khabar.kz