Стадион орындықтарын қиратқан балалардың ата-анасы заң алдында жауап берді

Сәтбаевтағы стадион орындықтарын қиратқан балалардың ата-анасы заң алдында жауап берді.

 Оқиға әлеуметтік желіде тарағаннан кейін жүгенсіз жасөспірімдерді полиция жедел анықтады. Бірақ шағын шаһарда бұзақылардың кесірінен бүлінген дүние бұл ғана емес. Балалардың вандализмге баруы жиілеп кеткен.

Ортақ мүлікті өшпенділікпен қиратқандар әрі кетсе 5-6 сыныптың оқушылары. Полиция вандализм фактісі бойынша іс қозғап, ата-аналарына айыппұл салды. Оған қоса келтірілген шығынды толық өтейтін болды.  Бірақ бұдан вандализм тыйыла ма?

Гүлмира Жұматова, облыстық білім басқармасының бөлім басшысы:

- Бізде орын алып жатқан вандализм жәй ғана бұзақылық емес, бала тәрбиесіндегі мәдениет пен жауапкершіліктің жеткіліксіздігі. Әр отбасы әр баламен біз бір жақты ғана білім беріп қоймай отбасымен бірлесіп жұмыс жасағанда ғана жетістікке жетеді деп ойлаймын. 

Мұғалімдер балалар вандализмі олардың қоғамдық орындағы мәдениетті білмеуінен болады дейді. Мысалы, орталық саябақтағы мына фонтанға бір айдың ішінде үш рет жөндеу жасалды.  Балалар  велосипедпен ішіне  түсіп, жарық шамдарын қиратқан. Вандализммен күресте отбасындағы тәрбиеге көңіл бөлу керек, дейді ардагер ұстаз Айтжан Жүнісова.

Айтжан Жүнісова, ардагер ұстаз:

- Бала тәрбиесіне ата-ананың қатты қарауы керек сияқты. Ата-ана қай уақытта болмасын, оның мектепте немесе далада жүргенде ата-ана сол балаға ие болуы керек. Барды бағалауды үйретіп, халықтың қазынасын шашпай төкпей, обал болады деген нәрсемен тәрбиелеу керек. 

Вандализм әрекеті көбіне жазғы каникул кезінде болады екен. Талдау жасаған мамандар осылай дейді. Мектептен тыс уақытта балалар арасында бұзақылық артады. Қалада 90-ға жуық отбасы ерекше бақылауға  алынды.

Гүлмира Жұматова, облыстық білім басқармасының бөлім басшысы:

- Қалалық, облыстық прокуратура тәуекел топтармен жұмыс қатты қолға алынып жатыр. Барлық білім беру ұйымдарында тізімдер жасақталып, балаларға ата-аналармен бірлесе жұмыс жасауға үлкен көңіл бөлінуде. Балалар бос кезінде бейсауат жүрмеу үшін алдын алу бойынша жұмыс жүргізілуде. 

Облыс бойынша балалардың бос уақытын тиімді ұйымдастыру үшін мектеп жанынан 170 лагерь жасақталды. Онда сауықтырумен қатар «Заң мен тәртіп» қағидаты және «Таза Қазақстан» акциясының маңызын түсіндіреді. Бұл вандализмді түпкілікті жоймаса да алдын алуға себеп болады дейді ұстаздар. 

Елдос Кәкенов, Нұрлан Исмаилов

Тегтер #Заң мен тәртіп #Сәтбаев #стадион #вандализм