Перизат Қайраттан тәркіленген көліктерді шенеуніктер мінетін болды, деп хабарлайды «24KZ».
Мемлекеттік мүлік және жекешелендіру комитетінің төрағасы Нұрмахан Әділбеков Орталық коммуникациялар қызметінде Перизат Қайраттың қымбат көліктері неліктен мемлекеттік органдарға берілгенін түсіндірді.
Айтуынша, мемлекеттік қызметшілердің мұндай люкс санатты көліктерді тізгіндеуі бюджет қаржысын үнемдеуге септігін тигізеді екен. Шенеуніктің айтуынша, бұл қалыпты тәжірибе.
«Жаңа көлік сатып алғанша, оларды тәркіленген мүліктің есебінен толтырған тиімдірек. Нормативтік-құқықтық актілерде құқық қорғау және мемлекеттік органдарға мұндай құқық берілген. Сондықтан бұл мүмкіндікті неге пайдаланбасқа?», – деді ол.
Бұған дейін Перизат Қайраттан тәркіленген қымбат көліктер саудаға шығарылған. Бірақ, мүлікті сатып алуға ниет білдіргендер табыла қоймаған.
Қазіргі уақытта су жаңа Mercedes көлігі елордалық полиция департаментіне, ал Lexus жол талғамайтын көлігі Қаржы министрлігіне берілгені белгілі болды.
Перизат Қайраттан тағы бірнеше люкс көлік тәркіленген еді, алайда олардың кімге бұйырғаны әзірге беймәлім.
Еске салайық, қайырымдылық қорының жетекшісі Перизат Қайрат алаяқтығы үшін 10 жылға сотталды. Қазір ол жазасын өтеп жатыр.
«24KZ» Telegram-арнасына жазылыңыз
Тегтер #Перизат Кайрат #қылмыс #24жаңалықтар #24KZPhone: +7 (7172) 757 485
E-Mail: 24kz@khabar.kz