Қазақстандықтардың 79,3%-ы елдегі қазіргі ахуалды қолайлы әрі тұрақты деп санайды. Бұл өткен жылдың сәйкес кезеңімен салыстырғанда 1,7 пайыздық тармаққа жоғары. Мұндай нәтиже Қазақстандық қоғамдық даму институтының 2026 жылдың III тоқсанында жүргізген сауалнамасында тіркелді, деп хабарлайды «24KZ».
Зерттеу қорытындысы бойынша, азаматтардың елдегі жағдайға ғана емес, өз өміріне де берген бағасы жоғары. Респонденттердің 83,6%-ы жеке өміріне қанағаттанатынын айтқан.
Экономикалық ахуалға қатысты пікір де негізінен оң. Сауалнамаға қатысқандардың 72,9%-ы ел экономикасының қазіргі жағдайын жақсы деп бағалаған. Яғни, әрбір он адамның жетеуінен астамы экономикалық ахуалды қолайлы деп санайды.
Көңіл-күй де тұрақты
Зерттеу барысында қазақстандықтардың эмоционалдық жағдайы да назарға алынған. Респонденттердің 88,1%-ы соңғы күндердегі көңіл-күйін жағымды немесе тұрақты деп сипаттаған.
Олардың 27,6%-ы көңіл-күйін тамаша деп бағаласа, 60,5%-ы қалыпты әрі бірқалыпты екенін айтқан.
Отбасылардың материалдық жағдайына қатысты көрсеткіш те тұрақтылықты аңғартады. Азаматтардың 69,1%-ы отбасы табысы сақталғанын немесе өскенін жеткізген.
Ал соңғы бір жылдағы өзгерістерге баға бергендердің 49,5%-ы өз өмірі мен отбасының әл-ауқаты жақсарғанын айтқан.
Бұл пікір әсіресе жастар арасында жиі кездеседі. 18-28 жастағы респонденттердің 57,7%-ы өмір жағдайының жақсарғанын мәлімдеген. 29-45 жас аралығындағы азаматтардың арасында бұл көрсеткіш 50,6%-ды құраған.
Ауыл тұрғындарының болашаққа сенімі жоғары
Алдағы бір жылға қатысты болжамдар да оң. Қазақстандықтардың 56,6%-ы бір жылдан кейін өзінің және отбасының жағдайы қазіргімен салыстырғанда жақсарады деп есептейді.
Бұл ретте ауыл тұрғындарының болашаққа деген сенімі қала халқына қарағанда жоғары болып отыр. Ауылда тұратындардың 61,9%-ы алдағы бір жылда өмірі жақсаратынына сенсе, қалалықтардың 53,4%-ы осындай пікір білдірген.
Осылайша, сауалнама нәтижелері қазақстандықтардың едәуір бөлігінде елдегі жағдайға, жеке тұрмысқа және жақын болашаққа қатысты оң көзқарас қалыптасқанын көрсетеді. Азаматтардың бағалауында қазіргі тұрақтылық сезімі мен болашаққа деген үміт қатар байқалады.
Зерттеу 31 шілде мен 16 тамыз аралығында жүргізілді. Оған еліміздің 18 жастан асқан 2 400 тұрғыны қатысты. Іріктеу кезінде респонденттердің жасы, жынысы, тұрғылықты елді мекені және өңірлік құрамы ескерілді. Сауалнаманың шекті қателігі 95% сенімділік деңгейінде ±2%-дан аспайды.
«24KZ» Telegram-арнасына жазылыңыз
«24KZ» Telegram-арнасына жазылыңыз
Тегтер #24KZ #24жаңалықтар #ҚҚДИ #әлеметтік зерттеу #зерттеу #сауалнамаPhone: +7 (7172) 757 485
E-Mail: 24kz@khabar.kz