Қазақстанда жыл басынан бері 90 миллионнан астам алаяқтық қоңырау бұғатталып, интернет-алаяқтық деректері 21%-ға азайды. Бұл туралы Ішкі істер министрлігі Киберқылмысқа қарсы іс-қимыл департаментінің бастығы, полиция полковнигі Жандос Сүйімбай брифингте мәлімдеді, деп хабарлайды 24KZ.
Оның айтуынша, биылғы тоғыз айда интернет-алаяқтық қылмыстарын ашу көрсеткіші 29%-ға өскен. Ал ашылмаған істер саны 12%-ға қысқарған. Жедел-профилактикалық іс-шаралар барысында 1 595 киберқылмыс анықталып, 724 адам ұсталған.
Жыл басынан тіркелген интернет-алаяқтықтардың саны 19 мыңнан 15 мыңға дейін, яғни 21%-ға азайды. Қылмыстарды ашу көрсеткіші өткен жылдың сәйкес кезеңімен салыстырғанда 29%-ға өсті, - деді ол.
Алаяқтық схемаларға мессенджердегі аккаунттарын алаяқтарға беретін адамдар мен банк карталарын ұсынатын дроптар да қатысады. Жыл басынан бері 150-ден астам активатор ұсталып, олардан 22 мыңнан астам SIM-карта тәркіленген. Сонымен қатар биылғы тоғыз айда құқыққа қайшы 82 мыңға жуық интернет-ресурс анықталып, бұғаттауға жіберілген.
Ұлттық Банктің Антифрод-орталығымен бірлескен жұмыстың нәтижесінде күмәнді операцияларға қатысты 212 мың оқиға тіркелген. Оның 76 мыңнан астамын ішкі істер органдары бастаған.
Ақша аударушылардың шоттарындағы 4 млрд теңге, ал дроптардың шоттарындағы 1,5 млрд теңге бұғатталды. Жәбірленушілерге өз еркімен 617 млн теңге қайтарылды, - деді Жандос Сүйімбай.
ІІМ киберқылмыспен күрес аясында халықаралық ынтымақтастықты да күшейтіп жатыр. Биыл Чехия полициясымен бірлескен операция кезінде Қазақстан азаматтарының дербес деректерін таратқан арнаға қатысы бар алты адам анықталып, олардың үшеуі ұсталды.
Ішкі істер министрлігі интернет-алаяқтықтың алдын алу үшін заңнаманы жетілдіру және халықаралық ақпарат алмасуды күшейту жұмыстарын да жалғастырып жатыр. Жандос Сүйімбай азаматтарды растау кодтары мен аккаунттарға қол жеткізу деректерін бөгде адамдарға бермеуге, күмәнді қоңыраулар мен ақша аударымдарына сақ болуға шақырды.
Тегтер #24жаңалықтар #24KZ #кибералаяқтар #дропперлерPhone: +7 (7172) 757 485
E-Mail: 24kz@khabar.kz