Мемлекет басшысы Қасым-Жомарт Тоқаевтың Корея Республикасына жасаған мемлекеттік сапары аясында Сеул қаласында маңызды марапаттау рәсімі өтті. Хангук шет тілдері университеті Орта Азиятану кафедрасының меңгерушісі, профессор Сон Ён Хун II дәрежелі «Достық» орденімен марапатталды, деп хабарлайды «24KZ».
Корея Республикасында қазақ тілі мен мәдениетін 20 жылдан астам уақыт бойы жүйелі түрде дәріптеп, екі ел арасындағы гуманитарлық байланыстарды нығайтуға сүбелі үлес қосқан шетелдік ғалымға мемлекет басшысы Сеулде арнайы құрмет көрсетті.
Қазақ мәдениетіне деген терең құрметінің белгісі ретінде өзін «Құдайберген» деп те атайтын профессор – Кореядағы беделді жоғары оқу орнында қазақ тілін оқыту ісінің негізін қалаушылардың бірі. Оның жетекшілігімен аталған университетке түлеп ұшқан талай жас маман екі мемлекет арасындағы дипломатиялық, экономикалық және мәдени қарым-қатынастарды дамытуға белсене атсалысып жүр.
Мемлекет басшысының Сеулдегі сапары барысында өткен бұл шара қазақ тілінің халықаралық аренадағы беделін арттырып, шетелдік ағартушылардың ерен еңбегін бағалаудың айқын көрінісіне айналды.
Тегтер #Сеул #марапаттау #президент #24жаңалықтар #24KZ #Сон Ён ХунPhone: +7 (7172) 757 485
E-Mail: 24kz@khabar.kz