«Біз бақытты баламыз»: 250 оқушы тарихи орындарға саяхаттайды

Жетісу облысында «Біз бақытты баламыз» онкүндігі басталды, деп хабарлайды 24KZ.

Мереке шымылдығы оқушылардың қасиетті орындарға сапарымен түрілді. 250 оқушы Шоқан Уәлиханов, Мұхаметжан Тынышбаев, ақын Сара атындағы және Үштөбедегі тарихи-өлкетану мұражайына саяхаттайды. Құпиясын қойнына бүккен Тамшыбұлаққа барып қайтады. Талдықорғанда «Open Air» – «Әншуақ» деп аталатын концерт, экологиялық акциялар, түрлі байқаулар ұйымдастырылды. Жастар үшін отбасылық марафон өткізілді. Оған 100-ден аса адам қатысты. Арқан тартыс сынды ұлттық ойындарға спорт басқармасы ұйытқы болды. Аудандардан келген жанұялар жарысы балаларға ерекше шаттық сыйлады. Шара жеңімпаздары арнайы сыйлықтармен марапатталды.

Еркежан Жанатханова, жарыс жеңімпазы:

- Бүгін біз бас жүлде алдық. Қуаныштымыз. Отбасымыздың бірге ойнап күлгеніміз, бірге құлағанымыз бәрібір жақсылық қой. Бұл деген – бір-бірімізге деген қатынастың, баламызға деген қатынастың, балаға деген ниетіміздің тәрбиеміз. Осының бәрі осы ойында көрсете алдық деп ойлаймын.

Гүлмира Ахметова, облыстық білім басқармасы басшысының орынбасары:

- Жетісу облысы бойынша 102 мың бала қамтылады. Олар қала сыртындағы және мектеп жанындағы лагерьлер мен тарихи орындарға саяхаттаумен, еңбекпен айналысып, жазғы демалысын өткізеді. Ең бастысы – бұл балалардың қауіпсіздігі. Бұл бағытта тиісті органдармен бірлесе отырып, лекциялар, түсіндіру жұмыстары жүргізіліп, балаларға жазғы демалыста өз қауіпсіздігін үйретіп жатырмыз.