Қырғызстанда Қ. Тоқаевтың кітабы таныстырылды

Ош қаласында Мемлекет басшысы Қасым-Жомарт Тоқаевтың "Әке туралы ой-толғау" атты кітабының қырғыз тіліндегі аудармасы таныстырылды.

Туынды қазақ әдебиетіндегі детектив жанрының негізін қалаған, көрнекті жазушы, қайраткер тұлға Кемел Тоқаевқа арналған.

Қасым-Жомарт Тоқаевтың кітабы туралы таныстырылым әкесі Кемел Тоқаевтың өмірінен сыр шертетін құжаттар мен фотосуреттердің қысқа ретроспективасынан басталды. Суреттерде сұрапыл соғыстың тауқыметі, адамдық пен адалдық туралы түсінік бейнеленеді. Көпшілікке Президент кітабының желісі бойынша түсірілген "Бауыр" атты деректі фильм көрсетілді. Онда ешбір қиындыққа қарамастан қол ұшын созуға дайын болған Кемел Тоқаевтың адамгершілігі туралы баяндалады. Әрі бұл қасиеттерді өз ұрпағының санасына сіңірткені жөнінде Қасым-Жомарт Тоқаев зор толғаныспен жазады.

Аскаралы Мадаминов, Қырғыз Республикасының Мәдениет, ақпарат, спорт және жастар саясаты министрінің орынбасары:

- Бұл кітап екі елдің достастығын нығайтуда ерекше рөл атқарады. Туындыны қазақшадан қырғыз тіліне аударып, оқырмандардың назарына ұсыну - қос мемлекет арасындағы рухани алмасуды одан әрі дамытатын маңызды қадам. Бұл халықтарымыздың бауырлас қарым-қатынасы мен мәдени біртұтастығын айқындай түседі. 

Кітап тұсаукесері Қырғыз Республикасы Сыртқы Істер министрілгінің конференция-залында өтті. Оған мәдениет және ақпарат министрі Аида Балаева қатысты. Ол өз сөзінде екі ел басшыларының сенім мен достықтан құралған қарым-қатынасы тек саяси-экономикалық деңгейде емес, мәдени-гуманитарлық байланысқа жол ашқанын айтты. Сондай-ақ бауырлас елдер арасындағы әдеби байланысты ерекше атап өті.

Курсантбек Аттокуров, Ош мемлекеттік университетінің проректоры:

- Кітапта сұрапыл соғыс жылдары суреттелген. Адамзат басына түскен тауқыметке қарамастан, қасқайып шығар жол таба білгендердің тағдыры жазылған. Әсіресе әділдік һақында әкесінің балаларына берген тәрбиесі өте әсерлі.  

Мемлекет басшысының еңбегін Бішкек жұрты оқуға кіріскен. Кітаптың бірнеше данасы таныстырлым барысында қатысушыларға сый ретінде табысталды. Бұл екі ел арасындағы ерекше лебіздің нышаны іспетті. Айта кетейік, осыған дейін еңбек бірнеше тілге аударылып, Моңғолия, Түркия, Әзербайжан және Сауд Арабиясында да таныстырылды.

Фариза Жанғанаева, Бакыт Чермашев

Тегтер #Қырғызстан #Кемел Тоқаев #кітап #Қасым Жомарт Тоқаев #24KZ