Қазақстандық мәнерлеп сырғанаушы, Олимпиада чемпионы Михаил Шайдоров Спорт министрлігімен жаңа келісімшартқа отырғаннан кейін, АҚШ-та танымал мамандармен бірге дайындыққа кірісті, деп хабарлайды «24KZ».
Спортшы өзінің Instagram парақшасында Калифорния штатының Ирвайн қаласында орналасқан әйгілі «Great Park Ice» мұз айдынынан фотосурет жариялап:
«Алдыда жаттығуға толы нәтижелі ай күтіп тұр, өте бос болмаймын», - деп жазды.
«Great Park Ice» - әлемдік деңгейдегі жұлдыздар жаттығатын танымал кешен. Бұл мұз айдынында Олимпиада чемпионы Нейтан Чен, әлем чемпионы Илья Малинин және NHL- дың «Anaheim Ducks» клубының хоккейшілері дайындалады.
Шайдоровтың жаңа маусымға мүлдем басқа мамандардың қол астында дайындалатынын оның ресми фан-қоғамдастығы да растады:
Осы айда Мишаның атқаратын жұмысы шаш-етектен. Ол әлемге әйгілі бапкер Рафаэль Арутюнянның жетекшілігімен жаттығады. Сонымен қатар, танымал хореограф Шей-Линн Борнмен бірге жаңа бағдарлама әзірлеуді жоспарлап отыр», - делінген хабарламада.
Айта кетерлігі, Михаилге бұған дейін Олимпиада алтыны мен әлем чемпионатының медалін алуға көмектескен ресейлік маман Алексей Урмановпен алдағы уақытта бірлесіп жұмыс істейтін-істемейтіні әзірге ресми түрде жарияланған жоқ.
Тегтер #Михаил Шайдоров #АҚШ #24жаңалықтар #24KZPhone: +7 (7172) 757 485
E-Mail: 24kz@khabar.kz