Қазақстанда соңғы жеті жылда 500-ден астам спорт нысаны салынды. Балалардың тегін спорт секцияларына қатысу мүмкіндігі кеңейіп, қазақстандық спортшылар Олимпиадада тарихи алтын медальдар жеңіп алды. Паралимпиада мен әлем чемпионаттарында да жаңа рекордтар тіркелді. «24KZ» ресми деректер негізінде 2019 жылдан 2026 жылғы қазанға дейінгі кезеңдегі негізгі жетістіктерді жинақтады.
Жеті жылда 500-ден астам спорт нысаны салынып, 228 мыңнан астам бала тегін секцияларға қатысады
Спорт саласындағы өзгерістердің бірі – инфрақұрылымның кеңеюі. Cоңғы жеті жылда Қазақстанда 500-ден астам спорт нысаны салынып, бірқатар нысан жөндеуден өтті. Бұл туралы Мемлекет басшысы Қасым-Жомарт Тоқаев VІ Дүниежүзілік көшпенділер ойындарының жеңімпаздары мен жүлдегерлерін марапаттауында айтты.
Президент ұлт саулығын нығайту және адам капиталын күшейту мемлекеттің конституциялық міндеті саналатынын мәлімдеп, осы бағытта қолға алынған іргелі істерді атады.
– Соңғы жеті жылда елімізде 500-ден астам спорт нысаны салынды, бірқатары жөндеуден өткізілді. Былтыр менің тапсырмаммен «Дене шынықтыру және спорт туралы» заңға бірқатар өзгеріс енгізілді. Жаңа заң отандық спорттың дамуына күшті серпін бермек, соның ішінде ұлттық спорттың өркендеуіне ерекше ықпал етеді. Балаларымыз спортпен немесе дене шынықтырумен міндетті түрде айналысуы керек. Бұл – еліміздің жарқын болашағының кепілі. Осы мақсаттың жалпыұлттық мән-мағынасы айрықша. Өйткені дене-бітімі әлсіз, рухы қауқарсыз халқы бар ел ешқашан озық, дамыған мемлекет бола алмайды. Бұл – баршаға белгілі ақиқат. Сондықтан спорт мектептерінде оқитын әр балаға бөлінетін қаражат көлемі екі есеге жуық артты, яғни 233 мың теңгеден 415 мың теңгеге ұлғайды. Былтыр 220 мыңнан астам бала спорт үйірмесіне мемлекет есебінен ақысыз барды. Осы мақсатқа 50 миллиард теңге бөлінді. Дене шынықтырумен шұғылданатын адамдардың саны 8 миллионнан асты. Бұл – халқымыздың жартысына жуығы деген сөз. Осы тұрғыдан алғанда, бізді салауатты ұлт деп атауға болады. Бірақ босаңсуға болмайды, – деді Президент.
2026 жылғы 1 шілдедегі мәліметке сәйкес, халықтың 44,5%-ы дене шынықтырумен және спортпен жүйелі айналысады. Елімізде 26,5 мың спорт нысаны жұмыс істейді. Биыл пайдалануға берілген 34 жаңа нысанның 21-і ауылда, 13-і қалада орналасқан.
Дзюдо мен мәнерлеп сырғанаудан тарихи Олимпиада алтындары
2024 жылғы Париж Олимпиадасында Қазақстан құрамасы 1 алтын, 3 күміс және 3 қола медаль жеңіп алды.
Елдос Сметов 60 келіге дейінгі салмақта топ жарып, Қазақстанға дзюдодан тұңғыш Олимпиада алтынын әкелді. Бұған дейін ол 2016 жылы Риода күміс, 2021 жылы Токиода қола жүлдеге ие болған еді. Осылайша, қазақстандық дзюдошы үш Олимпиадада жүлде жеңіп алды.
Парижде спорттық гимнастикадан да тарихи нәтиже тіркелді. Нариман Құрбанов Қазақстанға осы спорт түрінен алғашқы Олимпиада медалін әкеліп, күміс жүлдегер атанды.
Грек-рим күресінен Демеу Жадыраев пен бокстан Нұрбек Оралбай да күміс алды. Нысана көздеудегі аралас жұп Ислам Сәтпаев пен Александр Ле, дзюдошы Ғұсман Қырғызбаев және боксшы Назым Қызайбай қола медаль жеңіп алды.
2026 жылы қысқы спортта жаңа белес бағындырылды. Милан–Кортина Олимпиадасының ресми қорытындысына сәйкес, Михаил Шайдоров ерлер арасындағы жекелей мәнерлеп сырғанаудан Олимпиада чемпионы атанды.
Бұл – Қазақстанның қысқы Олимпиададағы 32 жылдан кейінгі алғашқы алтыны және мәнерлеп сырғанаудан тұңғыш Олимпиада чемпиондығы. Бұған дейін қысқы ойындарда Владимир Смирнов 1994 жылы алтын медаль жеңіп алған болатын.
Әлем чемпионаттарында рекорд жаңарды
2025 жылы Қазақстан спортшылары жазғы олимпиадалық спорт түрлерінен әлем чемпионаттарында 32 медаль – 14 алтын, 5 күміс және 13 қола жеңіп алды.
Министрлік бұл нәтижені тәуелсіздік кезеңіндегі рекорд деп бағалады. Бұған дейінгі ең жоғары көрсеткіш 2023 жылы тіркелген: ұлттық құрама 22 медаль алған, оның жетеуі алтын болған.
2025 жылғы маңызды жеңістердің бірі Ливерпульде өткен World Boxing аясындағы ерлер мен әйелдердің бірлескен әлем чемпионатында тіркелді. Қазақстан құрамасы 7 алтын, 1 күміс және 2 қола медальмен жалпы медаль есебінде бірінші орын алды.
Санжар Тәшкенбай, Махмұд Сабырхан, Төрехан Сабырхан, Айбек Оралбай, Алуа Балқыбекова, Аида Әбікеева және Наталья Богданова алтын медаль жеңіп алды.
Еркін күрестегі тарихи жеңіс те осы жеті жылдық кезеңге сәйкес келеді. Ризабек Айтмұхан 2023 жылы Белградта 92 келіге дейінгі салмақта әлем чемпионы атанды. Оған дейін қазақстандық балуандар ересектер арасындағы еркін күрес әлем чемпионатында алтын жеңіп алмаған еді.
Теннистегі үш ірі жеңіс және шахматтағы қос күміс
Елена Рыбакинаның табыстары Қазақстан теннисінің осы кезеңдегі басты жетістіктерінің бірі болды.
Теннисші 2022 жылы Уимблдонда, ал 2026 жылы Australian Open және US Open турнирлерінде жеңіске жетті.
US Open-дегі жеңісінен кейін Рыбакина алғаш рет WTA рейтингінің бірінші орнына көтеріліп, әлемдік рейтингті бастаған алғашқы Қазақстан өкілі атанды.
Шахматта Қазақстан әйелдер құрамасы 2024 және 2026 жылдары қатарынан екі Олимпиадада күміс медаль жеңіп алды. Алғашқы жүлде Будапештте, екіншісі Самарқандта алынды.
2026 жылғы жарыста ұлттық құрама жеті кездесуде жеңіп, төрт матчта тең түсті. Қазақстан әйелдер құрамасы Шахмат олимпиадасын алғаш рет бірде-бір командалық жеңіліссіз аяқтады.
Футзал құрамасы әлемнің үздік төрттігіне енді
Командалық спорттағы маңызды нәтижелердің бірі – футзалдан ұлттық құраманың 2021 жылы Литвада өткен әлем чемпионатында төртінші орын алуы.
Қазақстан футбол федерациясының ресми тарихында бұл ұлттық құраманың әлем чемпионатындағы ең үздік нәтижесі ретінде көрсетілген.
Қазақстан ширек финалда Иранды 3:2 есебімен жеңіп, жартылай финалға шықты. Осылайша, құрама әлемнің үздік төрт командасының қатарына енді.
Паралимпиадада тоғыз медальмен рекорд орнады
Қазақстанның 2024 жылғы Париж Паралимпиадасындағы нәтижесі де тарихи болды. Ұлттық құрама 2 алтын, 3 күміс және 4 қола медаль жеңіп алып, тоғыз жүлдемен рекорд орнатты. Жарысқа Қазақстан атынан спорттың тоғыз түрінен 44 спортшы қатысты.
Давид Дегтярев пара пауэрлифтингтен еліміздің алғашқы екі дүркін Паралимпиада чемпионы атанды. Ақмарал Науатбек Қазақстанға пара дзюдодан тарихи алтын әкелді.
Азиадада 84 медаль және жаңа чемпиондар
2026 жылғы қазанда аяқталған Аичи–Нагоя жазғы Азия ойындарында Қазақстан 12 алтын, 24 күміс және 48 қола – барлығы 84 медаль жеңіп алды.
Құрама жалпы есепте сегізінші орынға көтерілді. Ал 2023 жылғы Ханчжоу ойындарында Қазақстан 80 медальмен, соның ішінде 10 алтынмен 11-орында болған.
Жапонияда бірқатар спорт түрінен тарихи нәтиже тіркелді. Темірлан Тлеулес 58 келіге дейінгі салмақта жеңіске жетіп, Қазақстанға таеквондодан тұңғыш жазғы Азиада алтынын әкелді.
Төрехан Сабырхан мен Айбек Оралбай да бокстан алтын медаль жеңіп алды. Осылайша, қазақстандық боксшылар Азия ойындарында 2014 жылдан кейін алғаш рет чемпион атанды.
Ауыр атлет Алексей Чуркин 85 келіге дейінгі салмақта жұлқа көтеруден 173 келіні бағындырып, әлем рекордын орнатты.
Жеті жылдық кезең Қазақстан спортына жаңа чемпиондар мен бұрын болмаған жетістіктер әкелді. Халықаралық жарыстардағы нәтижелермен қатар, ел ішінде спорт нысандары көбейіп, балалардың тегін жаттығуына арналған мүмкіндіктер кеңейді.
Тегтер #спорт #жетістіктер #спорт нысандары #24жаңалықтар #чемпиондар #АзиадаPhone: +7 (7172) 757 485
E-Mail: 24kz@khabar.kz