Қазақстандық спортшылар 2019-2026 жылдары ұлттық спорт түрлерінен халықаралық аренада жоғары нәтиже көрсетті. Отандастарымыз әлем чемпионаттарында, Азия кубогінде, халықаралық турнирлерде және Дүниежүзілік көшпенділер ойындарында бірнеше рет топ жарды, деп хабарлайды «24KZ».
2019 жылы Ақтөбеде өткен қазақ күресінен әлем чемпионатында Қазақстан қоржынына үш алтын медаль түсті. Дәулет Ниетбай, Нұрым Салимгереев және Руслан Абдиразақов өз салмақ дәрежелерінде әлем чемпионы атанды.
2024 жылы Астанада V Дүниежүзілік көшпенділер ойындары өтті. Оған 89 елден шамамен 2700 спортшы қатысты. Қазақстан құрамасы 43 алтын, 32 күміс және 37 қола медальмен жалпыкомандалық есепте бірінші орын алды.
2024 жылы аударыспақтан Қазақстан спортшылары алты салмақ дәрежесінің бесеуінде алтын медаль жеңіп алды. Ал 2025 жылы Шымкентте өткен теңге ілуден тұңғыш әлем чемпионатында отандастарымыз үш бағдарламаның үшеуінде де чемпион атанды.
2026 жыл ұлттық спорт үшін тағы бір табысты кезең болды. Түркістанда өткен көкпардан әлем чемпионатында Қазақстан құрамасы чемпион атанды. Теңге ілуден II әлем чемпионатында да қазақстандық спортшылар екі алтын және бір күміс медаль иеленді.
Дәстүрлі садақ атудан Қазақстан спортшылары халықаралық жарыстарда жүлдеге қол жеткізді. Ыстамбұлдағы XIV FETIH KUPASI турнирінде қазақстандықтар сегіз медаль, оның ішінде үш алтын жүлде жеңіп алды. Малайзиядағы SEAHAWK Championships бәсекесінде жамбы атудан Асхан Зангар алтын медаль иеленді.
2026 жылғы VI Дүниежүзілік көшпенділер ойындарында Қазақстан құрамасы жалпыкомандалық есепте тағы да бірінші орын алды. Ел спортшылары аударыспақтан төрт, бәйгеден төрт алтын медаль жеңіп алды. Тоғызқұмалақтан Қазақстан қоржынына төрт алтын жүлде түсті.
Құсбегіліктен қазақстандықтар бір алтын, екі күміс және бір қола медаль иеленді. Жамбы ату мен дәстүрлі садақ атудан да ел құрамасы үш алтын медаль жеңіп алды. Асық атудың ордо нұсқасында Қазақстан спортшылары жүлдегерлер қатарынан көрінді.
Көкпардан VI Дүниежүзілік көшпенділер ойындарында Қазақстан құрамасы күміс медаль иеленді. Финалда отандастарымыз Қырғызстан құрамасына 2:7 есебімен жол берді.
Қазақ күресінен де Қазақстан спортшылары 2026 жылы жоғары нәтиже көрсетті. Бакуде өткен әлем чемпионатының алғашқы күнінде ел құрамасы үш алтын, бір күміс және бір қола медаль жеңіп алды. Рузимон Тугушев, Ернұр Сүлеймен және Жұмажан Қожамбеков әлем чемпионы атанды. Жұмажан Қожамбеков осылайша әлем чемпионатындағы бесінші жеңісіне қол жеткізді.
Осылайша, 2019-2026 жылдары Қазақстан ұлттық спорт түрлерінен әлемдік және халықаралық жарыстарда тұрақты түрде жүлде алып, көшбасшы елдердің біріне айналды. Әсіресе аударыспақ, бәйге, тоғызқұмалақ, теңге ілу, қазақ күресі, көкпар және дәстүрлі садақ атудан қазақстандық спортшылардың нәтижесі жоғары болды.
«24KZ» Telegram-арнасына жазылыңыз
Тегтер #24жаңалықтар #24KZ #ұлттық спорт #ҚР Туризм және спорт министрлігіPhone: +7 (7172) 757 485
E-Mail: 24kz@khabar.kz