Дайыров Мұрат 1910 жылы Солтүстік Қазақстан облысы Мәдениет ауылында туған. Ұлы Отан соғысында халқы үшін жанын берген батырлардың бірі. 1942 жылы Көкшетауда әскерге алынып, 1024-АП, 321-АД құрамында майдан даласына аттанды. Сұрапыл кезеңде қатардағы жауынгер атқыш қызметін атқарған. Бірақ әлі күнге дейін М.Дайыровтың қайда жерленгені туралы нақты ақпарат жоқ. Жуырда ғана батыр ұл қызмет еткен полк Ленинград түбіндегі шайқасқа қатысып, олардың басым бөлігі сонда қаза тапқаны анықталды. Мұрат атамен бірге шайқасқан көзі тірі ардагерлер оның неміс қақпанына түскенін, содан кейін оны мүлде көрмегендерін айтады. Қазір ҰОС қатысушысының қайда жерленгенін анықтау үшін қажетті ақпараттар іздестірілуде. Мұрат ата соғыс даласына аттанғанда, оның артында әйелі Күләш, қызы Нағима мен ұлы Ағыбай қалған. Ұрпағына ашық аспан сыйлаған ардақты майдангердің ұлы Дайыров Ағыбай қазіргі кезде Майшекер апамен үлгілі шаңырақ көтеріп, 9 баланың әкесі, 17 немере мен 1 шөберенің атасы атанып отыр. Ұлы Жеңістің 70 жылдығына орай Мұрат Дайыровтың туған жерінен аттанған 60-тан аса майдангердің рухына тағзым етіліп, ескерткіш орнатылды. Батыр бабалардың ұрпақтары бас қосқан асқа 500-ге жуық адам қатысты.