423,95 504.32 5.84
+7 (7172) 757 485 24kz@khabar.kz

Қ. Тоқаев: Қазақстан мен Ресей қауіпсіздік проблемалары саясатын үнемі бірге жүргізеді

  • 208
  • UPD: 22:03, 21.08.2021

Қазақстан Президенті Қасым-Жомарт Тоқаев Кремльде Ресей Президенті Владимир Путинмен кездесті, деп хабарлайды «Хабар 24».

«Қазақстан мен Ресей қауіпсіздік проблемалары саясатын үнемі бірге жүргізеді, бұл Ауғанстандағы жағдайға байланысты да ерекше мәнге ие» деп атап өтті Қасым-Жомарт Тоқаев. Ол сонымен қатар Казақстан мен Ресей одақтас екенін екіжақты қарым-қатынас пандемия кезінде де үзілмегенін жеткізді. Ресей Президенті өз кезегінде Ауғанстандағы жағдайға байланысты қауіпсіздік мәселесі өте өткір тұрғанын айтып, бұл жайттың дүйсенбі күні өтетін Ұжымдық қауіпсіздік шарт ұйымының аясында қаралатынына үміт артты.

Қасым-Жомарт Тоқаев Ресей Федерациясына жұмыс сапарымен барып, Президент Владимир Путинмен кездесті. Күн тәртібінде Ауғанстандағы жағдайға қатысты өңірлік қауіпсіздік, сондай-ақ Қазақстан мен Ресей арасындағы ынтымақтастық және интеграциялық байланыстар аясындағы өзара іс-қимыл мәселелері қаралды.

Мемлекет басшысы Ресей Президентіне Мәскеуге шақырғаны үшін алғыс білдірді. Қазақстан Президенті екі ел арасындағы барлық бағыттағы өзара ынтымақтастыққа жоғары баға берді.

«Шын мәнінде біздің байланыстарымыз ешқашан тоқтаған жоқ. Пандемия кезінде де онлайн жүйесінде және телефон арқылы байланысып тұрдық. Дегенмен жүз рет естігеннен, бір рет көрген жақсы. Қазақстан мен Ресей – одақтас елдер. Біз үнемі халықаралық күн тәртібіндегі өзекті мәселелерді, қауіпсіздікті, әсіресе екіжақты ынтымақтастықты үнемі пысықтап отырамыз. Елдеріміз арасындағы қатынастарымыз стратегиялық әріптестік бағытында дамып отырғаны қуантады», – деді Қасым-Жомарт Тоқаев.

Владимир Путин екі ел арасындағы тығыз байланыстарды атап өтті. 

- Біздің байланыстарымыз үзілген жоқ. Қатынастарымызды тұрақты, өте жоғары деңгейде және барлық бағыттар бойынша жүргізіп келеміз. Бұл – парламентаралық және үкіметаралық байланыстар. Жақында ғана біздің Үкіметіміздің басшысы Қазақстанда жұмыс сапарымен болып, ауқымды шаруалар атқарды және барлық кездесулер бойынша маған баяндап отырды. Пандемияға қарамастан бірінші жарты жылдықтағы тауар айналымы 33% артты. Халықаралық ұйымдарда, соның ішінде Шанхай ынтымақтастық ұйымы, Еуразиялық экономикалық одақ арқылы да байланыс орнаттық. Барлық бағыттар бойынша ілгерілеушілік бар. Одақтастық байланыстарымыз нығайып, жаңа сапада тың мүмкіндіктерге жол ашылуда.

Қасым-Жомарт Тоқаев екіжақты сауда-экономикалық байланыстар мен өңіраралық қатынастарды нығайтуды қолдады.

«Жаңа ғана екіжақты тауар айналымының нақты санын айттыңыз. Бұған қоса, көршілес өңірлеріміздің тауар айналымы 70% құрайтынын да айта кеткен жөн. Өңіраралық ынтымақтастық форумында кездесуді жоспарлап отырмыз. Қазан айындағы кездесу жүзбе-жүз өтпесе де, онлайн байланыста болады. Одақтас байланыстарымызға тың қарқын беретін бұл кездесуді жұртшылық күтіп отыр», – деп атап өтті Мемлекет басшысы. 

Ресей Президенті өз кезегінде жаһандық және аймақтық қауіпсіздіктің өзекті мәселелеріне ерекше мән берді.

«Әрине, қазіргі таңда ең өзекті мәселе – қауіпсіздік. Әсіресе Ауғанстандағы жағдай ушығып барады. Дүйсенбі күні Ұжымдық қауіпсіздік шарт ұйымы аясында бейнеконференция режимінде жиналып, пікір алмасамыз деп үміттенемін. Одан кейін қыркүйекте Шанхай ынтымақтастық ұйымы және Ұжымдық қауіпсіздік шарт ұйымы аясында жоспарлы жұмысымызды жүргізе береміз», – деді Владимир Путин.

Қасым-Жомарт Тоқаев туындап отырған сын-тегеуріндерге байланысты екі ел арасындағы өзара іс-қимылдардың маңызды екенін атап өтті.

«Шын мәнінде біз қауіпсіздік мәселесіне қатысты саясатымызды үнемі кеңесіп жүргіземіз. Бұл мәселе, әсіресе Ауғанстандағы жағдайға келгенде аса өзекті. Алдағы іс-қимылдарымызды жүйелеу үшін Сіздің осы жағдайға қатысты пікіріңізді білгім келеді», – деді Қазақстан Президенті.

Хабар 24 телеарнасы