377,95 433.40 5.6
+7 (7172) 757 485 24kz@khabar.kz
ҚАЗ

Елорда мектептеріндегі ас мәзіріне өзгеріс енгізіледі

  • 205
  • UPD: 22:50, 25.12.2018

Астанадағы мектеп асханаларында жаңа жылдан бастап ас мəзірі өзгереді. Бұл туралы Астана қаласы білім басқармасының басшысы Əнуар Жанғозин мәлім етті.

Əнуар Жанғозиннің айтуынша, келесі жылдың қаңтар айынан бастап жаңартылған ас мәзірі қаладағы 41 орта мектепке енгізіледі.

Содан кейін бұл өзгеріс басқа мектептерді де қамтитын болады. Алдағы жылы ҚР Білім және ғылым министрлігінің №717 бұйрығындағы жаңа өзгерістерге сəйкес, тамақтану ережелері жарияланады.

«Біріншіден, балалар жаңа ас мəзірі бойынша толыққанды тамақтанады. Екіншіден, аталған мəзірге түрлі тамақ түрі, яғни денсаулыққа пайдалы жемістер мен көкөністер енгізілмек. Мысалы, таңертең балаларға жаңа ас мәзірі бойынша сүттегі күріш ботқасы, бутерброд (май мен ірімшік), жеміс-жидек, алма немесе күріш, қант қосылған шай беріледі. Ал сағат 10-нан кейін оқитын оқушыларға сиырдың етінен жасалған котлет, макарон, алма және қант қосылған шай беріледі», - деді басқарма басшысы Астана қаласы әкімдігінде өткен брифингте.

Əнуар Жанғозиннің айтуынша, жаңа ас мәзірінің бағасы әр балаға 355 теңге болады. Жалпы келесі жылы оқушыларды тегін ыстық тамақпен қамтамасыз етуге жергілікті бюджеттен 4 млрд теңге шамасында қаражат қарастырылған. Ал жаңа ас мәзірін Қазақ тағамтану академиясы мақұлдап отыр.

Хабар 24 телеарнасы