Қазақстанда инновациялық гранттар байқауына өтінім қабылдау басталды

Бұл туралы ҚР Цифрлық даму, инновациялар және аэроғарыш өнеркәсібі министрі Бағдат Мусин өзінің Facebook парақшасында жазды, деп хабарлайды Хабар 24.

Инновациялық гранттар беру бойынша екінші конкурсқа өтінімдер қабылдау басталды.

«Биыл біз 1-12 ақпан аралығында инновациялық гранттар беру бойынша пилоттық байқау өткізген болатынбыз. Барлығы 661 өтінім түсіп, жіті сұраптау мен қазылардың таңдауынан кейін соңғы кезеңге тек бес үміткер ғана өтті: «ForumVR», InTech-Forecast «ЖҚК нысандары үшін IT-бағдарлама жасау», «COWMAS – ІҚМ туралы мәліметтерді бақылау және сараптау», «Смарт Терминал» жобасы, «Faceplate». Оларға технологияларды коммерцияландыруға арналған инновациялық гранттар беру туралы шарттар жасалды», – деді министр.

Пилоттық конкурстың нәтижесі бойынша сарапшылар мен грантқа ие болған кісілердің ой-пікірлерін ескере отырып, әріптестер байқау шарттарына өзгерістер енгізді. Енді байқауға қатысам деушілерде акселерациялық бағдарламалардан сәтті өткендігін дәлелдейтін сертификат болуы тиіс. Оның үстіне екінші және үшінші кезеңдегі іріктеуге қатысу үшін алдымен бірінші сатыдан өту шарт.

Сондай-ақ қаржыландыру шарттары да өзгерді. Бірінші сатыны іске асыруға арналған инновациялық грант сомасы 20 млн теңгеден, ал екінші және үшінші сатылар үшін 80 млн. теңгеден аспайды.

«Кеше инновациялық гранттар беру бойынша екінші конкурс жарияланды. Өтінімдер 2021 жылғы 10-23 тамыз аралығында https://qazinn.kz/ порталы арқылы қабылданады. Барлық сұрақтар бойынша тікелей Ильяс Оспановқа немесе Community QazInnovations кеңес беру Telegram-арнасына жаза аласыздар.

Барлық жасампаз жандарды осы конкурсқа қатысуға шақырамын, бұл – стартаптарыңызды жүзеге асырып, дамыту үшін өте жақсы мүмкіндік. Іске сәт!», – делінген Бағдат Мусиннің жазбасында.