425,63 492.05 5.92
+7 (7172) 757 485 24kz@khabar.kz

Мәулен Әшімбаев мұғалімдерді кәсіби мерекесімен құттықтады

  • 85
  • UPD: 12:20, 03.10.2021
Мәулен Әшімбаев мұғалімдерді кәсіби мерекесімен құттықтады фото: inform.kz

ҚР Парламенті Сенатының төрағасы Мәулен Әшімбаев мұғалімдерді кәсіби мерекесімен құттықтады.

Бұл туралы Сенат төрағасы өзінің Facebook парақшасында хабарлады.

«Құрметті ұстаздар!

Сіздерді бүгінгі кәсіби мерекелеріңізбен шын жүректен құттықтаймын!

Бұл күн – ұстаздардың ұлт тәрбиелеу жолындағы ерен еңбегіне деген ерекше құрметтің белгісі. Шын мәнінде, ұрпақтың ұлағатты да парасатты болып қалыптасуы мұғалімнің берген білімі мен тәліміне байланысты. Сондықтан ұстаз есімін ұлықтау – әр адамның азаматтық парызы.

Пандемия салдарынан білім беру саласы айтарлықтай зардап шеккені белгілі. Сол келеңсіздіктерді еңсеру жолындағы ұстаздардың қажыр-қайратын айрықша атап өткен жөн. Осылайша, мұғалімдеріміз өз қызметіне деген адалдықтың озық үлгісін көрсетті.

Қазіргі таңда мемлекет тарапынан ұстаздарға әлеуметтік қолдау көрсету жұмыстары кешенді түрде жүргізіліп келеді. Президентіміз биылғы Жолдауында педагогтердің жалақысын өсіру, олардың біліктілігін арттыру және бәсекеге қабілетті маман болуына қажетті жағдай жасау бойынша тиісті орындарға нақты тапсырмалар берді. Мемлекет басшысы белгілеп берген осындай міндеттердің нәтижелі іске асырылуын заңнамалық тұрғыдан қамтамасыз етуге Парламент Сенаты қашанда дайын.

«Алты Алаштың баласы бас қосса, төр – мұғалімдікі» деп Мағжан Жұмабаев айтқандай, ұстаздар қауымы қандай құрметке де лайық. Сол себепті, алдағы уақытта педагог мамандарға, жалпы білім беру ісіне жүйелі қолдау көрсету ісі жалғаса береді.

Бүгінгі төл мерекелеріңізбен құттықтай отырып, Сіздерге зор денсаулық, ұзақ ғұмыр, толайым табыс және амандық тілеймін! Жетістігімен қуантар шәкірттеріңіз көп болсын!», - деп жазды Сенат төрағасы өзінің Facebook әлеуметтік желісіндегі парақшасында.

Хабар 24 телеарнасы