423.87 509.00 5.59
+7 (7172) 757 485 24kz@khabar.kz
ҚАЗ

Егер тұрмыстық зорлық-зомбылықтың құрбаны болсаңыз...

  • 662
  • UPD: 15:23, 22.04.2020
Егер тұрмыстық зорлық-зомбылықтың құрбаны болсаңыз...

Елорда полициясы тұрмыстық зорлық-зомбылықтың құрбаны болғандар үшін шағымдану алгоритмін, дағдарыс орталықтарының мекенжайын және сенім телефондарын таратты, деп хабарлады елорда әкімдігінің ресми сайты.

БҰҰ мәліметтері бойынша коронавирус пандемиясына байланысты көп елдерде карантин шаралары енгеннен кейін тұрмыстық зорлық-зомбылықтың күрт өсуі байқалады.

Егер сіз зорлық-зомбылық құрбаны болсаңыз, мамандар сізге мына әрекеттерді орындауға кеңес береді:

  1. Дереу полицияға 102 телефонына хабарласыңыз. «Сіздерге маскалар мен антисептиктер түсті ме?» деген құпия сөзді қолданыңыз. Осылайша, отбасыдағы зорлық-зомбылықты жасырын хабарлауға болады. Содан кейін тұрғылықты мекен-жайды көрсету керек.
  2. Qamqor.gov.kz порталы арқылы онлайн-өтінім жіберуге болады.

«Сіз полиция қызметкерінен тұрмыстық зорлық-зомбылық болған жерге барып, құқықбұзушыға қарсы шара қолдануын талап етуге құқылысыз», – деді департамент өкілдері.

Жарақат алған жағдайда 103 телефонына хабарласып, жедел жәрдем шақырып, сот-медициналық сараптамадан өтуге полиция қызметкерінен анықтама алу керек.

Сондай-ақ республикада балалар, жастар мен ересектерге зорлық-зомбылық көрсетілген жағдайда 150 сенім телефоны тәулік бойы жұмыс істейді.

Сауалдарды telefon150.kz сайтында немесе +77081060810 WhatsApp анонимді нөмірі арқылы жолдауға болады.

Сонымен қатар елордада дағдарыс орталықтары жұмыс істейді. Онда әйелдерге психологиялық және заңгерлік көмек көрсетіліп, учаскелік инспекторлармен, қажетті ұйымдармен байланысу жолдарын ұсынады. Шағымның анонимдігі мен құпиялығына кепілдік беріледі.

«Өміріңізге қауіп төнген жағдайда көмек cұрау үшін орталықтарға жүгіне аласыз», – делінген хабарламада.

Орталықтардың мекенжайы және байланыс телефондары:

1) Нұр-Сұлтан қаласы әкімдігінің «Үміт» дағдарыс орталығы» КММ. Сенім телефоны: +7 7172 49-78-89 e-mail: centr_07_2013@mail.ru 

2) «Қорғау-Астана» жеке қоры. Сенім телефоны: +7 7172 63-46-01, 30-60-73 e-mail: Korgau_astana@mail.ru. 

Сондай-ақ Нұр-Сұлтан қаласы әкімдігі жанынан әйелдерге кеңес беріп, қажетті қолдау көрсететін әйелдер істері және отбасылық-демографиялық саясат жөніндегі облыстық комиссия жұмыс істейді.

Нұр-Сұлтан қалалық полиция бөлімінің әйелдерді қорғау бөлімшесі қиын жағдайға тап болғандарға заң жүзінде кеңес беруге, тұрмыстық зорлық-зомбылық құрбандарына көмек көрсету үшін 8 (7172) 71 60 63 сенім телефонын ұсынады.

Хабар 24 телеарнасы