432,64 506,00 5.46
+7 (7172) 757 485 24kz@khabar.kz
ҚАЗ

Қолма-қол ақша арқылы COVID-19 тарала ма – Ұлттық банк түсіндірмесі

  • 148
  • UPD: 10:11, 13.10.2020
Қолма-қол ақша арқылы COVID-19 тарала ма – Ұлттық банк түсіндірмесі

Қолма-қол ақша арқылы коронавирус таралуы мүмкін бе?

Бұл туралы ҚР Ұлттық банкі Қолма-қол ақша айналысы департаментінің директоры Ж.Қажымұратов түсіндіріп берді.

«Банкноттардағы COVID-19-дың «өміршеңдік мерзімі» тақырыбының бірнеше нұсқасы бар. Бір деректер бойынша вирус бөлме температурасында заттардың бетінде 28 күнге дейін, басқа деректер бойынша 24 сағатқа дейін өмір сүреді, Еуропа Орталық банкінің деректері бойынша банкноттардағы COVID-19 іздері бірнеше сағаттан кейін жоғалады. Біздің пікірімізше, банкноттардағы вирустың «өмір сүру қабілеттілігі» мәселесі дәлірек деректерді айқындау үшін одан әрі зерттеулерді қажет етеді.

Ұлттық банк әдеттегідей банкноттарды қайтадан айналысқа шығару алдында ақшаны банктік орауға орап, кемінде 14 күн сақтау орнында сақтайды. Осыдан кейін ғана біздің мамандар ақшаны сұрыптауға және санауға кіріседі. Банкноттарда вирустың өмір сүру ұзақтығы жөніндегі әртүрлі нұсқалардың болуы ескеріле отырып, алдын алу мақсатында қолма-қол ақша қайта санауға дейін ашылмаған күйі 45 күн бойы сақталады. Сондықтан Ұлттық банктен айналысқа түсетін банкноттардың бетінде COVID-19-дың болу ықтималдығы шамалы», - деді.

Сондай-ақ екінші деңгейдегі банктер, «Қазпочта» АҚ және инкассаторлық ұйымдар банкоматтар мен кассалық техниканы зарарсыздандыруды жүргізетінін айтып өтті.

«Өз тарапымыздан Дүниежүзілік денсаулық сақтау ұйымы мен Қазақстанның денсаулық сақтау министрлігінің ресми ұсынымдарын, сондай-ақ барлық уақытта қолданылатын гигиена ережелерін сақтау, жеке қорғану құралдарын пайдалану және басқалар сияқты орынды кеңестерді басшылыққа алуды ұсынамыз», - деді Ж.Қажымұратов.

Хабар 24 телеарнасы