Елімізде кешеден бері күн райы күрт бұзылып, тас жолдар жабылып жатыр, деп хабарлайды «Хабар 24».
Дәл қазір республикалық маңызы бар 10 жолдағы қозғалысқа шектеу қойылған. Атап айтқанда, Қарағанды-Павлодар, Нұр-Сұлтан-Теміртау, Қызылорда-Павлодар және Алматы-Өскемен бағытындағы жол уческелері жабық. Шығыс Қазақстан облысында Таскескеннен Алматы облысына қатынайтын жолда да қозғалыс уақытша тоқтап тұр. Қар құрсауында қалған көліктерді құтқару жұмыстары жалғасып жатыр. Өткен тәулікте Нұр-Сұлтан-Щучинск тас жолы бойындағы 2 көлік қауіпсіз жерге шығарылды. 1 адам ауруханаға жеткізілді. Ал Қарағанды облысында 8 адам эвакуацияланған. Оның екеуі – бала.