Елордада карантиндік және шектеу шараларын қатаңдату туралы қаулыға қаланың бас мемлекеттік санитарлық дәрігері Сархат Бейсенова қол қойды. Жаңа шектеулер 17 шілде күні күшіне енеді, деп хабарлады Нұр-Сұлтан қаласы әкімдігінің ресми сайты.
Қол қойылған құжатқа сәйкес мейрамханалардың, кафелердің және кофеханалардың жұмыс кестесі сағат 17:00-ге дейін қысқартылды.
«Орналасқан жеріне қарамастан, оның ішінде ашық ауада (жазғы орындар) мейрамхана, кафе және кофеханалар типі бойынша қоғамдық тамақтану нысандары (үй-жайда) жұмысын күшейтілген санитариялық-эпидемияға қарсы, санитариялық-профилактикалық іс-шараларды және көрші үстелдердің шеткі орындары арасында кемінде 2 метр әлеуметтік арақашықтықты сақтауы тиіс. Ал толымдылығы бойынша 50% дейін, бірақ 30 отыратын орыннан аспайтын шарттарды сақтап, дүйсенбі-жұма күндері сағат 07:00-ден 17:00-ге дейін жұмыс кестесі белгіленді, ал сенбі және жексенбі күндері жұмыс істеуіне тыйым салынған», – делінген қаулыда.
Бұл ретте «Ashyq» жобасына қатысатын қоғамдық тамақтану орындары дүйсенбі-жұма аралығында сағат 07:00-ден 20:00-ге дейін жұмыс істейтін болады, ал сенбі және жексенбі күндері жұмыс істеуіне тыйым салынады.
Ұжымдық, салтанатты, отбасылық, естелік және басқа да бұқаралық іс-шараларды ұйымдастыруға қатаң тыйым салынады. Тек «Ashyq» жобасына қатысатын нысандарда еске алу шарасын өткізуге рұқсат беріледі.