Өңірде ауа райының күрт өзгеруіне байланысты 3 бағыт бойынша республикалық маңызды жолдар жабылды, деп хабарлайды Pavlodarnews.kz.
Павлодар облыстық төтенше жағдайлар департаментінің баспасөз қызметінің мәлімдеуінше, 29 наурыз күні сағат 18:40-та ауа райының нашарлауына байланысты Шідерті кентінен Қарағанды облысының шекарасына дейін республикалық маңызы бар автожол, Қызылорда-Павлодар автожолы (1135-1206 км) көліктің барлық түрлері үшін қозғалыс шектелді.
- Қатты боран салдарынан жолдар көк тайғақ болып, нашар көрініп, автокөліктердің қатынауына кедергі келтіруде. Сондықтан өңір тұрғындары мен қонақтарын қолаймыз ауа райында жолға шықпауға шақырамыз. Әрі жолда абай болуды ескертеміз, - деді Шідерті кенті №14 өрт сөндіру бөлімінің бастығы Расул Ысқақов.
Сонымен қатар бүгін сағат 19:15-те Ақмола облысында ауа райының нашарлауына байланысты республикалық маңызы бар "Нұр-сұлтан-Ерейментау-Шідерті" автожолы учаскесінде (200-254 км) Шідерті кентінен Ақмола облысының шекарасына дейін көліктің барлық түрлері үшін қозғалыс тоқтатылды.
Бұдан бөлек, Қалқаман ауылынан Қалқаман-Баянауыл-Үміткер-Ульяновский (0-231 км.) автожолы учаскесінде қозғалыс жабылды.
- Шідерті кентінде 50 автомашина тоқтатылды. Оның 20-сы жеңіл, 30-ы жүк көлігі. Автожолдардың жабық учаскелерінде 14жылыту пункті дайындалды, - делінген хабарламада.
Блок бекеттерде халықтың қауіпсіздігін қамтамасыз ету мақсатында ТЖД қызметкерлері ПД және жол иелерімен бірлесіп тиісті түсіндіру жұмыстарын жүргізілуде.