Елде отандық құрылыс материалдарын онлайн алуға болатын «Маркетплейс» жүйесі іске қосылады. Мұнда қазақстандық өнімдерді делдалсыз және 15 проценкке төмен бағаға алуға болады.
Онда өндірушілер мемлекеттің қолдауымен ұзақ мерзімді келісім-шарт жасасып, қатаң бақылауда болады. Бұл туралы ҚР Индустрия және инфрақұрылымдық даму бірінші вице-министрі Қайырбек Өскенбаев айтты. Сондай-ақ мемлекеттік тапсырыс бойынша салынып жатқан нысан жайлы деректер келесі жылдан бастап E-ҚҰРЫЛЫС бірыңғай ақпараттық жүйесі арқылы қадағаланады. Яғни бюджеттен жұмсалған әрбір қаражат ашық болады.
Алмаз Ыдырысов, ҚР ИИДМ комитет төрағасының орынбасары:
- E-Qurylys жүйесінің блокчейн-тетіктері арқылы сатып алынған отандық құрылыс материалдары бойынша мердігерлердің есептері мемлекеттік сатып алу порталында көрсетілетін болады. Сондай-ақ нысанның жобалау-сметалық құжаттамасында көрсетілген деректер автоматты түрде салыстырылады. Айта кетейін, жүйеге бюджет қаражатынан ешқандай қаржы жұмсалмады.