Елімізде нарықтағы үй бағасының өсу рейтингі жарияланды

Соңғы бір жылдағы тұрғын үй бағасына қатысты Қазақстан қалаларының рейтингі жасалды, деп хабарлайды «Хабар 24» Tengrinews.kz-ке сілтеме жасап.

Тізімінің басында Ақтау тұр. Бұл қаладағы қайталама нарықтағы үйлер 41%-ке қымбаттаған. Бір жыл бұрын 7-8 миллионға сатып алуға болатын пәтер қазір 11 миллионға жетіп отыр. 

Екінші орында – Ақтөбеде 35 процентке өссе, одан кейін Қызылордада 34%-ке артқан, яғни бір бөлмелі пәтер бір жылда 2-2,5 миллионға қымбаттады. 

Алматы рейтингте төртінші орын иеленді. Мұндағы бір бөлмелі пәтерлер 17 миллионнан 23 миллионға, екі бөлмелі - 24 миллионнан 32 миллионға, үш бөлмелі - 31 миллионнан 41 миллионға дейін қымбаттады.

Ел астанасы рейтингтің ортасынан орын алды. Бір жыл ішінде елордада баға төрттен бірге өсті. Орташа 1 бөлмелі пәтердің құны 13,5 миллион болған, қазір 17 миллионға жуық. 

Екі бөлмелі пәтерлер 20-21 миллионнан 25 миллионға дейін қымбаттады. Үш бөлмелі  33 миллионнан 36 миллионға дейін.

Петропавл мен Көкшетауда тұрғын үй 15-16 пайызға қымбаттады. Алайда бұл өңірлер бойынша ең төменгі көрсеткіш.

Тұрғын үй сарапшыларының айтуынша, бағаның өсуі әлі де жалғасады. Соңғы айда елдегі тұрғын үйлер орташа есеппен 3 процентке қымбаттаған.