Маңғыстау облысындағы үш ауыл толықтай ауызсумен қамтылды
Маңғыстау облысында үш бірдей ауыл тұрғындары толықтай ауызсумен қамтылды.
Бұл туралы Маңғыстау облысы әкімінің баспасөз қызметі хабарлайды.
Бүгін Форт-Шевченко қаласында тәулігіне 5000 текше метр теңіз суын тұщыта алатын жаңа зауыт іске қосылды. Салтанатты шараға Маңғыстау облысының әкімі Нұрдәулет Қилыбай, ҚР Парламенті Мәжілісінің депутаты Мұсабаев Самат және аудан тұрғындары қатысты.
Жаңа өндірістік нысан теңіз суын өңдеп, санитарлық талаптарға сай сапалы ауызсу ұсынады. Бұл зауыт Форт-Шевченко, Баутино және Аташ елді мекендерінің тұрғындарын толықтай ауызсумен қамтамасыз етпек. Аталған үш елді мекенде шамамен 12 мыңға жуық халық тұрады, олардың қазіргі тәуліктік су тұтыну көлемі 3500 текше метрді құрайды.
Зауыттың ашылу рәсімінде Маңғыстау облысының әкімі Нұрдәулет Қилыбай жергілікті халықты құттықтап, өңірде іске асып жатқан жобаларға тоқталып өтті.
Мемлекет басшысы Қасым-Жомарт Тоқаевтың өңірлерді таза ауызсумен қамтамасыз ету жөніндегі тапсырмасына сәйкес облыста бірнеше ірі жоба қолға алынды. Су тапшылығы – аймақ үшін ең өзекті мәселелердің бірі. Осы бағытта жүйелі жоспарлар жасалып, кезең-кезеңімен жүзеге асырылып жатыр. «Атқарылып жатқан жұмыстардың нәтижесін жақын арада көретін боламыз», - деді Нұрдәулет Қилыбай.
Шара барысында жобаны іске асырушы – «Толағай 2050» ЖШС Түпқараған аудандық су жүйесі мекемесіне арнайы автокөлік сыйға тартты.
Айта кетейік, облыста ауыз су мәселесін түбегейлі шешу үшін бірқатар ірі жобалар жүзеге асырылуда. Атап айтқанда, маусым айының соңына дейін «СК-А-Строй» ЖШС іске асырып жатқан су тұщыту зауытының қуаты 5000-нан 8000 текше метрге дейін ұлғайтылмақ. Тамыз айынан бастап Ақтау қаласына қосымша тәулігіне 3000 текше метр, ал Баянды ауылындағы қондырғы арқылы Мұнайлы ауданына тәулігіне 4000 текше метр ауыз су жеткізіледі. Сонымен қатар маусым айының соңында «Кендірлі» курорттық аймағында орналасқан «Тоқмақ» жерінде қуаттылығы тәулігіне 50 мың текшеметр болатын ірі су тұщыту зауытының құрылысы аяқталады деп күтілуде.