Петропавлда аутизм орталығы ашылды

Петропавлда аутизммен ауыратын балаларды қолдау орталығы ашылды. Бұл оларды ортаға бейімдеп, қарым-қаблеттерін дамытуға мүмкіндік береді. Ұйым мамандары ата-аналарға да психологиялық көмек көрсетеді.

Бұл орталыққа 40-тан аса бала келеді. Оларға түрлі әлеуметтік қызметтер қарастырылған. Мамандар әр баламен жеке-жеке жұмыс істеп, ортаға бейімдейді.

Наталья Сергеева, қала тұрғыны:

- Балам осындай ортада дамиды. Олар өзара араласып, бір-біріне зейін қояды. Дағдыларды меңгереді. Бұл ата-аналар үшін өте маңызды. Себебі үй жағдайында шұғылдану оңай емес.

Өңірде аутизм спектрі бұзылған 516 бала тіркеуде тұр. Сондықтан ата-аналарға арнайы әлеуметтік көмектің қолжетімді болуы өте маңызды.

Ғалия Баязитова, үйрме үйлестірушісі:

- Жұмыспен қамтуды үйлестіру және әлеуметтік бағдарламалар басқармасы бойынша әлеуметтік мемлекеттік тапсырыс бойынша жүзеге асырылып жатыр. Балалардың бағыт-бағдары шығармашылық жағынан басталады, содан кейін үйдегі жұмыстарды іске асыру бойынша, яғни әлеуметтік дағдыларды қамту бойынша бағыттарды алып жатырмыз.

Облыс бойынша 4 мың бала инклюзивті білім алады. Оларға балабақша, мектеп, колледждерде арнайы кабинеттер ашылған.

Әсел Оразбаева, Білім басқармасының баспасөз хатшысы:

- Осындай балаларды қолдау мақсатында мектептерде арнайы кабинеттер ашылып жатыр. Қазір осындай кабинеттердің саны - 30. 2029 жылға дейін тағы 8 кабинет ашылады. Жалпы инклюзивті білім беру жағдайы 97 пайызы балабақшада, 98 пайызы мектепте және барлық колледжде жасалған. 

Өңірде ерекше білім беру қажеттілігі бар балаларға кешенді психологиялық-педагогикалық қолдау көрсету үшін 26 арнайы мекеме жұмыс істейді.

Авторлары: Айдарбек Айтмұхамбетұлы, Қуаныш Қазбеков