Маңғыстау облысында ботулизм диагнозымен жансақтау бөліміне түскен 9 жасар бала көз жұмды. Қайғылы хабарды баланың туыстары растады, деп хабарлайды «24KZ».
Жақындарының айтуынша, науқас бала кеше, 6 қазанда жансақтау бөлімінде қайтыс болған. Баланың өліміне отбасы мүшелері уланып қалған үй жағдайындағы балық себеп болған.
Ал ауруханаға түскен баланың әкесінің жағдайы тұрақталды. Қазір тағы екі ересек адам Облыстық көпсалалы ауруханада ем қабылдап жатыр. Ал медициналық мекеме өкілдері бұл жағдайға қатысты пікір білдіруден бас тартты.
Еске салайық, бұған дейін Мұнайлы ауданында үй жағдайында ысталған балық жеген тұрғындар ауруханаға түскені хабарланған болатын. Үш ересек адам мен 9 жасар баладан ауыр ботулизм белгілері байқалып, барлық науқас өкпені жасанды желдету аппаратына қосылған және оларға арнайы ботулизмге қарсы сарысу берілген еді. Кейінірек баланың туыстары Астанадан білікті мамандарды шақырып, көмек сұраған болатын.
