Жамбыл облысында аузымен сурет салатын ару тұрады

Жамбыл облысында екі қолы еңбекке жарамсыз болса да, аузымен сурет салатын қыз бар, деп хабарлайды «Хабар 24».

Сал ауруына шалдыққан Аяжан Жуатайдың шығармалары кәсіби суретшілерден кем емес. Бояуларға жан бітіріп, боямасыз туындыларымен таңғалдырған ерекше өнер иесі жайында Мерей Бает айтсын.

Қаратау қаласында тұратын 26 жастағы Аяжан сәби кезінен сал ауруына шалдыққан. Дегенмен қос қолының икемге келмегені шығармашылықпен айналысуына кедергі болмады. Дарын иесі дертіне дауа іздей жүріп, аузымен сурет салуды 13 жасында үйреніп алыпты.  

Аяжан Жуатай, жас суретші:

- Суретпен кейде алданасың да, бір басқа әлемге кірген сияқты болып. Сол осымен жұбанасың, қолдаушым ғой сурет. Арманым сол, жұмыс істегім келеді негізі ел қатарлы сол.

Аяжан сурет салудан бөлек, қолөнермен айналысып, өлең оқығанды ұнатады. Өнерлі қыз негізінен портреттік жанрға ден қояды. Мультфильм кейіпкерлерінің сұлбасын салып, табиғатты да бейнелейді. Қылқалам шеберінің шығармаларына сұраныс көп. Кейде арнайы тапсырыс та түсетінін айтады. Жас суретшінің өнерін кәсіби суретшілер де жоғары бағалайды.  

Рахат Нұрбек, Қаратау қалалық балалар өнер мектебінің мұғалімі:

- Компоновкасы бар, мысалы, өзіміздің бейнелеудегі терминдерге тоқтала кетсек. Өте жоғары кәдімгі кәсіби суретшінің салған суретінен кем емес. Арнайы білімі болмаса да, осы оқып жатқан балалардың деңгейімен бірдей деп айтуға болады. 

Аяжан қалалық деңгейде бірнеше рет көрме өткізді. Ендігі арманы – ел аралап, ауқымды өз шығармаларының галереясын жасау.

Авторлары: Мерей Бает, Руслан Ахатіллә.