Түркістанда республикалық «AL-FARABI» интеллектуалды ойыны өтті

12 тамыз – халықаралық Жастар күніне орай Түркістанда республикалық «AL-FARABI» интеллектуалды ойыны өтті.

Жастардың ақыл-ойы мен білімі сынға түсетін сайысқа Түркістан облысынан бөлек, Астана, Алматы, Шымкент қалалары мен Жамбыл және Қызылорда облыстарынан 200-ден астам жас қатысып, бақ сынады. Ойын жеңімпаздарын Түркістан облысының әкімі Дархан Сатыбалды марапаттады.

Облыстық Қоғамдық даму басқармасына қарасты «Жастар ресурстық орталығының» ұйымдастыруымен өткен шараның мақсаты – дарынды жастарды анықтау, олардың танымдық қызығушылығын ояту арқылы білім деңгейін көтеру. Ойынның 2-ші кезеңіне облыс әкімі Дархан Сатыбалды қатысып, жастарға сәттілік тіледі.

Дархан Сатыбалды, Түркістан облысының әкімі:

- Қазіргі таңда әлем күн сайын емес, сағат сайын өзгеруде. Сол себепті біздің қоғамды алға сүйрейтін осындай білімді, интелектуалды жастырмыз еліміздің дамуына үлес қоса берсін. Біз білім саласында қандай да бір өзгеріс болып жатса, қолдау керек болса, шын жүректен қолдауға дайынмын.  

Интеллектуалды ортаны қалыптастыру, жастар арасында шешендік мәдениетті дамыту бағытында ұйымдастырылған сайысқа еліміздің әр өңірінен 50-ге жуық команда қатысты. Нәтижесінде Бәйдібек ауданының «BBC» командасы сайыс жеңімпазы атанды. Екінші орынға Алматыдан келген «Oilike team» командасы ие болса, үшінші орынды Шымкенттің «Әл-Фараби» командасы еншіледі.

Жандос Теміржанов, Бәйдібек ауданы "BBC" командасының капитаны:

- Біріншіден осындай интелектуалды ойынды ұйымдастырушыларға үлкен алғыс білдіремін. Бұл жастырымызды ақылға, білімге қызықтыратын үлкен бір ауқымды шара деп есептеймін. Бүгін сәттілік серік болып, 1 орын алып жатқан жағдаймыз бар. Өте қуаныштымыз.

Сайыс жеңімпаздарына 500 мың, 2-ші орынға 300 мың және 3-ші орын иегерлеріне 200 мың теңге қаржылай сыйлық берілді. Сонымен қатар «Үздік білімгер» аталымы бойынша 1-орынға 150 мың, 2-орынға 100 мың, 3-орын иегері 50 мың теңгеге ие болды. 10-нан аса командаға қаржылай ынталандыру сыйлықтары тапсырылды.

Авторлары: Жандос Жұмабек, Ерболат Әбіш