Алматыда «Бесбармақ» фильмі көрерменге таныстырылды

Алматылық көрерменге «Дәмді комедия» таныстырылды.

Tiger Films продюсерлік компаниясының жаңа туындысы «Бесбармақ» деп аталады. Қазақтың ұлттық ет тағамы арқылы бала арманына жол тартқан кейіпкердің өмірі туралы қызықты фильм Kinopark-Kinoplex кинотеатрлар желісінен көрсетіледі.

Фильм жол бойындағы шағын дәмханада жұмыс істейтін Дәулет есімді жігіттің басынан өткен қызықты оқиғалары арқылы өрбиді. Алматыдан келген қонақтың көңілін табу үшін Дәулет әжесі дайындаған бесбармақты ұсынады. Дәмі тіл үйірер етке риза болған танымал ресторатор жас аспазды өз мейрамханасына жұмысқа шақырады. Енді ол ерекше тағамды тез әрі әжесінікіндей дәмді етіп жасауға мәжбүр болады.

Медет Қалибекұлы, сценарий авторларының бірі:

- Мақсаты киноның бұл жаңағы адамдардың өз арманына сенуі әрқашан сол армандар орындалады дегенге сену. Бесбармақ - бұл бас кейіпкердің ұзақ авантюралық жолға демеу деп айтса болады.

Фильмдегі басты рөлдерді Рамазан Амантай, Аян Өтепберген, Роза Мұқатаева, Қуандық Шәкіржанов ойнайды. Шығармашылық ұжым комедия арқылы ұлттық құндылықтарды ұтымды дәріптей білген.

Жомарт Зейнәбіл, актер:

- Ұлттық құндылықтарымызды ұлттық  тағамымыз болсын, ұлттық ойындарымыз болсын, көкпар болсын, басқа болсын, өзімізге тән нәрселерді түсіріп, халық көп көретін осындай әзіл  қалжың, комедиялар арқылы болса да халықтың жастардың назарына ұғындыра  беру керек шығар деп ойлаймыз.

«Бесбармақ» Tiger Films продюсерлік компаниясының шығарған 20-шы фильмі. Жаңа туындыны 26 қазаннан бастап Kinopark-Kinoplex кинотеатрлар желісінен тамашалауға болады.

Авторлары: Гүлжан Көленқызы, Әбен Нарымбаев