«Таза Қазақстан»: Түркістан облысында 150 мың түп ағаш отырғызылды

«Таза Қазақстан» экологиялық акциясы аясында Түркістан облысындағы Сарапхана ауыл округінде орналасқан «Мәңгілік ел» саябағының аумағы тазаланды, деп хабарлайды 24KZ.

Ағаш егіліп, талдардың түбі әктелді. Күл-қоқыс шығарылып, парк аумағы ретке келтірілді.

Сарапхана ауылдық ардагерлер кеңесінің төрағасы Жұмабек Оразбаев саябақты тазалау ісіне бүгін әдейі келіп, жастарға батасын берді. Ұрпақ сабақтастығы жарасым тапқан тазалық ісіне 250-ге тарта жас пен кәрі қатысты.

Жұмабек Оразбаев, Сарапхана ауылдық ардагерлер кеңесінің төрағасы:

- Міне, елімізде үлкен тазалық жұмыстары жүріп жатыр. Рахмет, мінеғ аудан көлемінде келіп жатыр жастырымыз. Жастар бақытты болсын. Әрдайым осындай елді таза ұстап, еліміз өркендеп, өсе берсін.

Үлкеннің алғысын алған жігерлі жастар ағаш отырғызып, көшеттердің түбін қопсытты. Талдардың түбін әктеп, төңіректі арам шөптен арылтты. Гүлдердің төңірегін тазалап, орындықтарды сырлады. Көпшілік серуендейтін жолақтарды сыпырды.

Нұршерім Әзімбай, ерікті:

- 200-ге жуық жастар тартылып, 5 тонна күл-қоқыстан тазартылды. Аудан жастары барлық тазалық жұмысына қатысты. 27 мың көшет егіліп, сырлау, тазалау, шөп ору жұмыстары жалғасуда.

Райымбек Айтубай, ардагер-журналист:

- Тәртіптің өзі осы тазалықтан басталады. Осы орайда еліміздегі атқарылып жатқан жұмыстар орасан. Болашақ ұрпаққа экологиялық мәдениетті қалыптастыруда үлкен үлгі-өнеге болуда.

Тазалық науқан басталғалы бері Қазығұрт ауданында 45 көпқабатты үйдің ауласы жиналып, кіреберісі ретке келтірілді. 10-ға жуық саябақ пен аллеялар көгалдандырылды. 70 шақырым аяқ жолдар тазаланды. Тазалық жұмыстарына 12 мыңнан аса адам қатысқан.

Нұрсұлтан Медеуов, аудан әкімінің орынбасары:

- 140 шақырымға жуық облыстың маңызы бар жолдар тазаланды. 160 шақырымға жуық аудандық маңызы бар жолдар, 223 көшеде тазалық жұмысы жүргізілді. Одан бөлек, 70 шақырымдай ирригациялық арықта тазаланды. Саябақтарымызда 700-ден астам гүл отырғызылды.

Ал, жалпы Түркістан облысы бойынша акция шеңберінде 150 мың түп ағаш отырғызылып, 175 мыңға жуық ағаш әктелді. 40 мың шаршы метр аяқжолдар тазаланып, 350-ге жуық саябақ пен скверлер ретке келтірілді. Сонымен қатар 302 мыңнан астам жеке үй мен 1500-ден астам әлеуметтік нысанның ауласы тазаланды. Оған барлығына 67 мыңнан астам адам қатысты.

Авторлары: Жандос Жұмабек, Ерболат Әбіш